lisotsok: សង្គម

កម្មករនឹងទទួលបានប្រាក់សោធននិវត្តន៍នៅឆ្នាំ ២០១៥(4)

កម្មករនឹងទទួលបានប្រាក់សោធននិវត្តន៍នៅឆ្នាំ ២០១៥

ក្រុមហ៊ុនបញ្ជាទិញអាមេរិកស្នើកម្ពុជាដោះស្រាយប្រាក់ឈ្នួលឲ្យបានឆាប់(3)

ក្រុមហ៊ុនបញ្ជាទិញអាមេរិកស្នើកម្ពុជាដោះស្រាយប្រាក់ឈ្នួលឲ្យបានឆាប់

កីឡាស៊ីហ្គេម(2)

សម្តេចហ៊ុនសែន ចំណាយលុយផ្ទាល់ខ្លួនជាង ៤ សែនដុល្លារ ផ្តល់ជូនកីឡាករ បានមេដាយ ពីកីឡាស៊ីហ្គេម

ការបង្រ្កាបបាតុករនៅផ្លូវវេងស្រេង(1)

កម្មករ ប្រជាពលរដ្ឋ អ្នកលក់ដូរ សិស្សសាលា អ្នករត់ម៉ូតូកង់បីច្រើននាក់ត្រូវស្លាប់និងរងរបួស

Showing posts with label សង្គម. Show all posts

Tuesday, March 11, 2014

យន្ដហោះ នាវាចម្បាំងអាមេរិក ចាប់ផ្ដើមធ្វើសមយុទ្ធជាប់ព្រំដែនរុស្ស៊ី

3/11/2014 11:50:00 AM

Sam

នៅថ្ងៃទី១១មីនា អាមេរិកបានបង្ហាញពីការប្ដេជ្ញាការពារសម្ពន្ធមិត្ដណាតូ របស់ខ្លួននៅជាប់ព្រំដែនប្រទេសរុស្ស៊ី តាមរយៈការធ្វើសមយុទ្ធជាទ្រង់ទ្រាយធំ នៅជាប់ព្រំដែនទាំងនោះ ។ នេះជាការ ធ្វើសមយុទ្ធដំបូងបង្អស់របស់អាមេរិក នៅជាប់ព្រំដែនរុស្ស៊ី ស្របពេលដែល រដ្ឋាភិបាលរុស្ស៊ីប្រកាសគាំទ្រការពារ តំបន់ស្វ័យត្នគ្រីមៀ ។

នៅតំបន់សមុទ្រខ្មៅដែលមានកម្លាំង ទាហានជើងទឹករុស្ស៊ីឈរជើងនៅតំបន់ គ្រីមៀ នាវាចម្បាំងអាមេរិក USS Truxtun បំពាក់កាំជ្រួចមីស៊ីលនាំផ្លូវ ចូលរួមក្នុងការធ្វើសមយុទ្ធជាមួយកម្លាំង ទាហានជើងទឹកប្រទេសរូម៉ានី និង ប៊ុលហ្គារី ។ ចំណែកនៅភាគខាងជើង ប្រទេសប៉ូឡូញ យន្ដហោះចម្បាំងអាមេ រិកកំពុងឆ្ពោះទៅកាន់ទីតាំងទ័ពអាកាស Lask ដើម្បីធ្វើសមយុទ្ធរួមនៅពេលដ៏ខ្លី ខាងមុខ ។ អាមេរិកនិងប៉ូឡូញបាន ប្រកាសថា ការធ្វើសមយុទ្ធនោះ បាន ឡើងគម្រោងជាយូរណាស់មកហើយ មិនពាក់ព័ន្ធនឹងភាពតានតឹងក្នុងតំបន់ គ្រីមៀនោះឡើយ ។ ប៉ុន្ដែសកម្មភាពទាំង នោះ បានបញ្ជាក់ពីការប្ដេជ្ញារបស់អាមេ រិកក្នុងការការពារគ្រប់បណ្ដាប្រទេសម្ពន្ធ មិត្ដណាតូ ក្រោយពេលដែលប្រទេសទាំង នោះបង្ហាញការព្រួយបារម្ភពីការជ្រៀត ជ្រែករបស់រុស្ស៊ីទៅនឹងប្រទេសអ៊ុយក្រែន។

ការធ្វើសមយុទ្ធបានបង្ហាញយ៉ាងច្បាស់ ថា អាមេរិកនៅតែជាប្រទេសនាំមុខក្នុង ប្រតិកម្មរបស់សហគមន៍អន្ដរជាតិទៅ លើប្រទេសរុស្ស៊ីជ្រៀតជ្រែកចូលក្នុង ប្រទេសអ៊ុយក្រែន ។

កន្លងមកប្រធានាធិបតីរុស្ស៊ី វ្ល៉ាឌីមៀ ពូទីន បានបញ្ជាក់ថា ការដាក់បញ្ចូលគ្រីមៀ ស្ថិតក្នុងអធិបតេយ្យភាពរុស្ស៊ី គឺ ជារឿងស្របច្បាប់ ដោយសារតែសកម្ម ភាពទាំងនោះធ្វើតាមបំណងរបស់ពលរដ្ឋ គ្រីមៀតែប៉ុណ្ណោះ មិនមែនជាការបង្ខិតបង្ខំនោះឡើយ ។ ចំណែកលោកខាងលិច ចាត់ទុកថា ការដាក់បញ្ចូលនោះ គឺខុសទៅនឹងច្បាប់អន្ដរជាតិ ៕

ប្រភពៈ នគរវត្ត

អានបន្ត

បាញ់ព្រមានអ្នកឃ្លាំមើលនៅគ្រីមា,រុស្ស៊ីបង្កើនការគំរាម

3/11/2014 11:22:00 AM

Sam

កងទ័ពតំបន់គ្រីមាទើបបង្កើតថ្មីប្រមាណ១០០នាក់ ដើរក្បួន បន្ទាប់ពីការសច្ចាប្រណិធាននៅក្រុង Simferopol កាលពីថ្ងៃទី៨ មីនា។ AFP

ក្រុងស៊ីមហ្វើរ៉ូពុលៈ កម្លាំងជីវពល គាំទ្រវិមានក្រឹមឡាំង បានបាញ់គ្រាប់កាំភ្លើងព្រមាន ខណៈ ក្រុមអ្នកសង្កេតការណ៍បរទេស បានព្យាយាមចូលតំបន់គ្រីមា ពីថ្ងៃសៅរ៍ ក្នុងពេលរុស្ស៊ីបានបង្កើនការប្រឈមមុខដាក់គ្នាជាមួយ លោកខាងលិច ជុំវិញបញ្ហាអ៊ុយក្រែន ដោយគំរាមកំហែងមិនឲ្យក្រុងវ៉ាស៊ីនតោន ត្រួតពិនិត្យអាវុធនុយក្លេអ៊ែររបស់ខ្លួន។

ភាពតានតឹងកាន់តែធំ និងគ្រោះថ្នាក់នៅឧបទ្វីបតំបន់សមុទ្រខ្មៅ ដែលរុស្ស៊ីបានដណ្តើមកាន់កាប់ប្រកបដោយប្រសិទ្ធភាពកាលពី សប្តាហ៍មុន គេបានឃើញខ្មាន់កាំភ្លើងក្នុងឈុតយោធានិងមួករោមសត្វ៤០នាក់ បាញ់ជាច្រើនគ្រាប់ បង្ហើរពីលើក្បួនរថយន្តមួយ ដែលមានអ្នកសង្កេតការណ៍ស៊ីវិល និងយោធា៥៤នាក់មកពី២៩ ប្រទេសនៃអង្គការសន្តិសុខ និងកិច្ចសហប្រតិបត្តិការនៅទ្វីបអឺរ៉ុប (OSCE)។

នេះគឺឈានដល់ថ្ងៃទីបីជាប់គ្នាហើយ ដែលក្បួនរថយន្តក្រុង របស់អង្គការ OSCE បានប៉ុនប៉ងចូលឧបទ្វីបដែលបែកបាក់ដោយភាពតានតឹងនេះដើម្បីពិនិត្យ មើលជម្លោះជាប់គាំងដែលកំពុងប្រឈមមុខដាក់គ្នារវាងទាហានអ៊ុយក្រែន ដែលគេគ្របសង្កត់ប្រឆាំងនឹងកម្លាំងរុស្ស៊ី និងកម្លាំងជីវពលគាំទ្រវិមានក្រឹមឡាំង។

សេវាកម្មឆ្មាំព្រំដែនអ៊ុយក្រែន បានបន្ថែមទៅនឹងបរិយាកាសរក កលនឹងផ្ទុះ ដោយរាយការណ៍ថា យន្តហោះល្បាតធុនស្រាលរបស់ខ្លួនមួយ បានរងការវាយប្រហារពី«ក្រុមជ្រុលនិយម»នៅក្នុងតំបន់ ជាមួយគ្នានោះ ប៉ុន្តែមិនត្រូវបាន ប៉ះពាល់នោះទេ។

បេសកកម្មឃ្លាំមើលនោះគឺជា ផ្នែកទ្រឹស្តីមួយនៃការជំរុញ ខាងការទូតបីមុខព្រួញរបស់ប្រធានាធិបតីអាមេរិក លោក បារ៉ាក់ អូបាម៉ា ដែលបូកបញ្ចូលទាំងការអំពាវនាវឲ្យរុស្ស៊ីដកទ័ពរបស់ខ្លួន ពីតំបន់គ្រីមាទៅចូលបន្ទាយវិញនិងដើម្បីឲ្យអ៊ុយក្រែនរៀបចំការ បោះឆ្នោតមុនកាលកំណត់ក្នុងខែ ឧសភា។

អ៊ុយក្រែនដែលប្រជាជន៤៦លាននាក់ និងបែកបាក់គ្នាខាងវប្បធម៌នេះ បានស្ថិតក្នុងភាពច្របូកច្របល់ចាប់តាំងពីភាពវឹកវរសម្លាប់មនុស្សបីខែដែលបានធ្វើឲ្យប្រធានាធិបតីអស់អំណាច លោក វិកទ័រ យ៉ានូកូវិច ទៅលាក់ខ្លួននៅរុស្ស៊ី។

វិមានក្រឹមឡាំង ចោទប្រកាន់ ក្រុមអ្នកគ្រប់គ្រងថ្មីពីបទញុះញង់ បរិយាកាសបំភិតបំភ័យប្រឆាំងក្រុមវាគ្មិនរុស្ស៊ី ដែលបង្កើតក្រុម សំឡេងភាគច្រើននៃតំបន់អាគ្នេយ៍អ៊ុយក្រែន។ រឿងនោះ បានបង្កឲ្យ ប្រធានាធិបតីវ្ល៉ាឌីមៀរ ពូទីន គំរាមកំហែងប្រើកម្លាំងជាការសម្រេច ចិត្តដ៏តក់ស្លុត ដែលបានបង្កជាវិបត្តិសន្តិសុខលោកខាងកើត និងខាងលិចដ៏អាក្រក់បំផុត។

រុស្ស៊ី និយាយថា ខ្លួនបានបង្កើន ការការពារមូលដ្ឋានទ័ពជើងទឹកតំបន់គ្រីមារបស់ខ្លួន និងកំពុងធ្វើការរួមជាមួយកងឯកភាពស្វ័យ ការពារក្នុងតំបន់ ប៉ុន្តែបានបដិសេធ មិនទទួលស្គាល់ទាហានពិសេស ដែលកំពុងពង្រាយ។

ប៉ុន្តែ ឧត្តមសេនីយ៍ឆ្មាំព្រំដែនអ៊ុយក្រែន លោក Mykola Kovil បាននិយាយថា ពេលនេះមាន ទាហានរុស្ស៊ី៣ម៉ឺននាក់នៅក្នុងតំបន់គ្រីមា ក្នុងនោះ៥ពាន់នាក់ជាទាហានដែលអនុញ្ញាតឲ្យចូលក្រោម កិច្ចព្រមព្រៀងជាមួយក្រុងកៀវ ទាក់ទងទៅនឹងមូលដ្ឋានកងនាវាសមុទ្រខ្មៅ។

សេវាកម្មឆ្មាំព្រំដែននោះកាលពីថ្ងៃសៅរ៍ក៏បានចោទប្រកាន់រុស្ស៊ីពីបទដណ្តើមកាន់កាប់ស្ថានីយចំណត នាវាចម្លងមួយនិងចំណតនាវាទ័ពជើងទឹកមួយ នៅភាគខាង កើតនិងភាគនិរតីតំបន់គ្រីមាដើម្បី បញ្ជូនក្បួនរថយន្តដឹកជញ្ជូនយោធា៦៧គ្រឿងជាមួយទាហាន ទៅ កាន់ក្រុង Simferopol របស់តំបន់នោះ។

រុស្ស៊ី បង្កើនការគំរាមកំហែងនុយក្លេអ៊ែរ

ការសម្រេច ចិត្តរបស់រុស្ស៊ីដើម្បីបញ្ចេញសាច់ដុំយោធារបស់ខ្លួន បានបណ្តាលឲ្យក្រុងវ៉ាស៊ីនតោនប្រកាសផែនការហាមប្រាមទិដ្ឋាការ និងការបង្កកទ្រព្យសម្បត្តិលើ ក្រុមមន្ត្រីក្រុងម៉ូស្គូ ខណៈកំពុង ផ្អាកប្រតិបត្តិការយោធារូបភាពជាច្រើន។

សហភាពអឺរ៉ុបបានគំរាមកំហែង បន្ថែមទៀតដើម្បីរឹតបន្តឹងទណ្ឌកម្មសេដ្ឋកិច្ចប្រឆាំងរុស្ស៊ី បើសិនជា ពួកគេមិនចរចាបើកចំហជាមួយអ៊ុយក្រែនទេនោះ។

ការិយាល័យរបស់ ប្រធានាធិបតីបារាំង លោក ហ្វ្រង់ស្វ័រ ហូឡង់ បាននិយាយថា លោកនិងលោក អូបាម៉ា បានឯកភាពគ្នាតាមទូរស័ព្ទពីថ្ងៃសៅរ៍ថា វិធានការថ្មី នឹងត្រូវចាត់ ដែលប៉ះពាល់គួរឲ្យកត់សម្គាល់លើទំនាក់ទំនងរវាងសហគមន៍អន្តរជាតិ និងរុស្ស៊ី បើសិនជាក្រុងម៉ូស្គូមិនកាត់បន្ថយការគំរាមកំហែងសន្តិសុខកំពុង កើនឡើងភ្លាមៗនៅជាយខាងកើតអឺរ៉ុបនោះទេ។

ប៉ុន្តែរដ្ឋមន្ត្រីការបរទេសរុស្ស៊ី លោកស៊ើហ្គេយ៍ ឡាវរ៉ូវ បានប្រាប់សមភាគីអាមេរិក លោកចន ឃើរី ថា វិធានការទណ្ឌកម្ម ណាមួយ នឹងក្លាយជាការវាយប្រហារបំផ្លិចបំផ្លាញមួយ។

ក្រុមហ៊ុន ថាមពលរដ្ឋដ៏ធំរបស់រុស្ស៊ី Gazprom បានចាប់ផ្តើម បង្កើនសម្ពាធកាលពីថ្ងៃសុក្រដោយព្រមានអ៊ុយក្រែនថា ខ្លួនអាចកាត់ផ្តាច់ការដឹកជញ្ជូនឧស្ម័ន ដោយសារតែបំណុលកើនឡើង។ ការផ្អាកនោះនឹងស្ទើរតែប៉ះពាល់ដល់អតិថិជនអឺរ៉ុបខាងលិច និងធ្វើឲ្យខូចខាតកិត្តិនាមរបស់វិមានក្រឹមឡាំងថែមទៀត៕

ប្រភពៈ ភ្នំពេញប៉ុសិ៍្ត

អានបន្ត

ព័ត៌មានសំខាន់ៗដែលកាសែតខ្មែរចុះផ្សាយនៅថ្ងៃ១១ មីនានេះ

3/11/2014 11:11:00 AM

Unknown

ភ្នំពេញៈ កាសែតខ្មែរនៅថ្ងៃអង្គារនេះ ចាប់អារម្មណ៍រឿងបញ្ហាផ្សេងៗគ្នា លើទំព័រមុខខ្លួន។ កាសែតកម្ពុជាថ្មី និងរស្មីកម្ពុជា ចាប់អារម្មណ៍នឹងជំនួបចរចាបក្សទាំងពីរកាលពីម្សិលមិញ។ កម្ពុជាថ្មី បានរាយការណ៍ថា ក្រុមការងារគណបក្សទាំងពីរពិភាក្សាបានលទ្ធផលល្អតែមិនចេញសេចក្តីថ្លែងការណ៍រួម។ កាសែតបន្តថា មានចំណុចសំខាន់ៗពីរដែលត្រូវបានក្រុមការងារលើកឡើងគឺ បញ្ហាកំណែទម្រង់ការបោះឆ្នោត និងសុចរិតភាពនៃអង្គការសង្គមស៊ីវិល។ កម្ពុជាថ្មី ដែលមាននិន្នាការគាំទ្រគណបក្សប្រជាជនកម្ពុជានោះ ក៏ចាប់អារម្មណ៍ចុះផ្សាយរឿងគណបក្សកាន់អំណាចនេះដែរ ដោយបានលើកប្រសាសន៍លោកនាយករដ្ឋមន្ត្រីហ៊ុន សែនថា គណបក្សប្រជាជនកម្ពុជាថ្លែងអំណរគុណប្រជាពលរដ្ឋដែលបានបោះឆ្នោតជូន នៅក្នុងពិធីសម្ពោធផ្លូវនៅខេត្តបាត់ដំបងកាលពីម្សិលមិញ។ ទំព័រមុខកម្ពុជាថ្មីក៏ចាប់អារម្មណ៍ចុះផ្សាយរឿង រថយន្តទំនើប២គ្រឿងត្រូវ អណ្តាតភ្លើងឆាបឆេះសន្ធោសន្ធៅដោយសារទុស្សេអាគុយ និងកូនតុងទីនជាង ១០០នាក់ផ្ទុះការតវ៉ាក្រោយមេតុងទីនវេចលុយ ៣០ ម៉ឺនដុល្លាររត់ចោលផ្ទះ។ មិនខុសគ្នាទេ កាសែតរស្មីកម្ពុជាវិញ ក៏ចាប់អារម្មណ៍ជំនួបបក្សទាំងពីរ និងលើកឡើងពីប្រសាសន៍លោកនាយករដ្ឋមន្ត្រីដែរ។

ងាកមកចាប់អារម្មណ៍ព័ត៌មាន កាសែត មនសិការខ្មែរ លើបញ្ហាតែមួយដូច កម្ពុជាថ្មី និងរស្មីកម្ពុជា មនសិការខ្មែរវិញបានចុះផ្សាយព័ត៌មានជំនួបបក្សទាំងពីរថា គណបក្សប្រជាជននៅតែអូសក្រឡា ចំពោះកំណែទម្រង់បោះឆ្នោត និងគ្មានឆន្ទៈបញ្ចប់វិបត្តិនយោបាយឲ្យបានឆាប់រហ័សទេ។ កាសែតប្រឆាំងបន្តនេះរាយការណ៍ព័ត៌មានថា ក្តីសង្ឃឹមនិងជម្រើសសម្រាប់ការផ្លាស់ប្តូរជីវភាពថ្មីរបស់ប្រជារាស្ត្រខ្មែរពឹងអាស្រ័យទៅលើមេដឹកនាំដែលមានព្រហ្មវិហារធម៌និងការទទួលខុសត្រូវ និងអត្ថបទព័ត៌មានមួយទៀតថា ក្រៅពីវាយតម្លៃទាបចំពោះរដ្ឋអំណាចកម្ពុជា ក្រោមការដឹកនាំរបស់ ហ៊ុន សែន គឺនៅមានការថ្កោលទោសលើបទឧក្រិដ្ឋសម្លាប់ប្រជាពលរដ្ឋស្លូតត្រង់ថែមទៀត។

ចំណែកឯ កាសែត កោះសន្តិភាពវិញ នៅថ្ងៃនេះក៏ចាប់អារម្មណ៍ប្រសាសន៍លោកនាយករដ្ឋមន្ត្រី ដែលចំអកឲ្យបក្សប្រឆាំងថា ដដែលដូចគ្នា ដោយស្រង់សំដីលោកនាយករដ្ឋមន្ត្រីហ៊ុន សែនថា គេថាមុខដដែល ចុះបក្សប្រឆាំងមុខដដែលដែរ ម៉េចមិនថា?។ ព័ត៌មានទំព័រមុខ កោះសន្តិភាពនៅថ្ងៃនេះ បន្តចាប់អារម្មណ៍ ប៉េអឹមក្រុងប៉ោយប៉ែតបង្ក្រាបអាជីវកម្ម ស៊ីសា និងប៉េអឹមកាប់ដើមឈើទាលនៅមាត់អូរព្រំដែន ថៃខឹងបិទច្រករបៀង នៅខេត្តបន្ទាយមានជ័យ។ ចំណែក នគរវត្ត វិញ ក៏ចាប់អារម្មណ៍រឿង ទាហានឈុតខ្មៅថៃបិទច្រករបៀង ព្រោះខឹងខ្មែរកាប់ឈើក្នុងតំបន់ហាមឃាត់ដែរ ប៉ុន្តែ រឿងធំនៅ នគរវត្ត នៅថ្ងៃនេះ គឺកាសែតនេះ ចាប់អារម្មណ៍រឿង លេចមុខក្រុមនៅពីក្រោយការវាយប្រហារ ភេរវកម្មលើយន្តហោះដឹកអ្នកដំណើរម៉ាឡេស៊ី។ កាសែតនេះ បានរាយការណ៍ថា លិខិតមួយច្បាប់របស់ជនជាតិចិន ដែលគេអះអាងថា ជាអ្នកនៅពីក្រោយការវាយប្រហារភេរវកម្មលើយន្តហោះដឹកអ្នកដំណើររបស់ម៉ាឡេស៊ីកំពុងតែបង្កភាពភ្ញាក់ផ្អើលដល់មិត្តអ្នកអាននៅគ្រប់ទិសទី ពិសេសនៅប្រទេសចិន។ កាសែតនេះបានបន្តថា កាលពីថ្ងៃទី១០ មីនា សារព័ត៌មាន Wantchinatimes បានផ្សព្វផ្សាយថា ជនជាតិចិនមួយក្រុមបានអះអាងថា ក្រុមរបស់ខ្លួនជាអ្នកវាយប្រហារទៅលើយន្តហោះដឹកអ្នកដំណើរម៉ាឡេស៊ី។

ក្រលេកមកចាប់អារម្មណ៍ កាសែត ខេមបូឌា ដេលីវិញ នៅថ្ងៃនេះវិញ បែរជាទៅចាប់អារម្មណ៍រឿង រដ្ឋាភិបាលមានគម្រោងហាមមិនឲ្យអ្នកដែលមានសញ្ជាតិពីរឈរឈ្មោះជាបេក្ខជននាយករដ្ឋមន្ត្រី។ កាសែតកូនកាត់នេះបានដកស្រង់សំដីតំណាងរាស្ត្រជាន់ខ្ពស់គណបក្សប្រជាជនកម្ពុជា គឺលោក ជាម យៀប ថា រដ្ឋាភិបាលកំពុងពិចារណាអំពីការកែប្រែច្បាប់ស្តីពីសញ្ជាតិរបស់ប្រទេសកម្ពុជា ដើម្បីហាមមិនឲ្យអ្នកដែលមានសញ្ជាតិពីរឈរឈ្មោះជាបេក្ខជននាយករដ្ឋមន្ត្រី។ កាសែតបន្តលើកឡើងសំដីរបស់លោក ជាម យៀបដោយពន្យល់ថា គំនិតកែប្រែដែលលើកឡើងថា នឹងជួយទប់ស្កាត់អំពើក្បត់ជាតិបាននោះ នឹងមិនត្រូវបានដាក់ចេញនៅពេលឆាប់ៗនេះទេ ក៏ប៉ុន្តែគឺជាផែនការមួយក្នុងចំណោមផែនការរយៈពេលវែងរបស់រដ្ឋាភិបាលកម្ពុជា។

សូមអានព័ត៌មានពិស្តារក្នុងកាសែតទាំងនោះ ដែលបានចេញផ្សាយនៅថ្ងៃនេះ

ប្រភពៈ ភ្នំពេញប៉ុសិ៍្ត

អានបន្ត

មេសហជីពមិនទាន់ស្របគ្នាចំពោះការធ្វើកូដកម្មនៅផ្ទះនៅថ្ងៃស្អែក

3/11/2014 11:01:00 AM

Unknown

កម្មករឈរសាទរនៅមុខផ្ទះដែលគេជួលស្នាក់នៅពេលតវ៉ាកាលពីខែមករា។ រូបថត ផា លីណា

ភ្នំពេញៈ ការធ្វើកូដកម្មនៅផ្ទះមិនទៅធ្វើការនៅក្នុងវិស័យកាត់ដេរ ដែលគ្រោងធ្វើឡើងនៅថ្ងៃស្អែកនេះ កំពុងស្ថិតក្នុងភាពមិនច្បាស់លាស់ បន្ទាប់ពីកម្មករ និងមេដឹកនាំសហជីពមួយចំនួន ជំរុញឲ្យមានការពន្យារពេលរហូតដល់ក្រោយពីចូលឆ្នាំខ្មែររួច។ នេះបើតាមមេដឹកនាំសហជីពម្នាក់ ដែលបានថ្លែងកាលពីម្សិលមិញ។

លោក ប៉ាវ ស៊ីណា ប្រធានសម្ព័ន្ធសហជីព ចលនាកម្មករ(CUMW) បានថ្លែងថា កម្មករមួយចំនួន ភ័យខ្លាចថា កូដកម្មនេះ នឹងធ្វើឲ្យពួកគេមិនមានប្រាក់សម្រាប់ពិធីចូលឆ្នាំខ្មែរនា ពេលខាងមុខនេះ។

លោកបន្ថែមថា មេដឹកនាំសហជីពចំនួន១៨ដែលដឹកនាំឲ្យមានកូដកម្មនេះ នឹងជួបប្រជុំគ្នានៅថ្ងៃនេះ ដើម្បីសម្រេចថា តើនឹងត្រូវបន្តធ្វើកូដកម្មឬអត់? លោកបន្តថា៖ «យើងចង់បន្តការគ្រោងធ្វើកូដកម្មនេះ ប៉ុន្តែយើងបានទទួលសំណូមពរនេះ ពីសមាជិកនិងកម្មករឲ្យពន្យារពេលរហូតដល់បន្ទាប់ពីចូល ឆ្នាំខ្មែរខែក្រោយ»។

អស់រយៈពេលជាច្រើនសប្តាហ៍សហជីព បានគំរាមថា កូដកម្មនៅផ្ទះ មិនទៅធ្វើការនឹងចាប់ផ្តើមធ្វើឡើងនៅថ្ងៃស្អែក ហើយនឹងបន្តរហូតដល់យ៉ាងហោចណាស់ថ្ងៃទី១៩ ខែមីនា។ សហជីព និងកម្មករ ដែលចង់ធ្វើកូដកម្មនេះ គឺដើម្បីទាមទារប្រាក់ខែអប្បបរមាចំនួន១៦០ដុល្លារ និងការដោះលែងសកម្មជនសហជីពនិងកម្មករកំពុងជាប់ឃុំចំនួន២១ នាក់ ដែលត្រូវបានចាប់ខ្លួននៅក្នុងអំឡុងបាតុកម្មកាលពីដើមខែ មករា។ កិច្ចខិតខំប្រឹងប្រែងរបស់សហជីព ដើម្បីប្រារព្ធធ្វើវេទិកាសាធារណៈមួយនៅទីលានប្រជាធិបតេយ្យ កាលពីថ្ងៃសៅរ៍ នៅថ្ងៃទិវាសិទ្ធិនារីអន្តរជាតិ ត្រូវបានរារាំងដោយអាជ្ញាធរ ដោយសារអាជ្ញាធរបានធ្វើការបិទតំបន់នោះ។

លោក ប៉ាវ ស៊ីណា បានថ្លែងបន្តថា៖ «ប្រសិនបើយើងបន្តទៅមុខថានឹងធ្វើកូដ-កម្ម យើងនឹងប្រកាសទៅកម្មករទាំងអស់ឲ្យនៅផ្ទះដើម្បីចៀសវាងបញ្ហា ណាមួយជាមួយនគរបាលឬកងរាជអាវុធហត្ថ»។

ប៉ុន្តែលោក រ៉ុង ឈុន ប្រធានសហភាពសហជីពកម្ពុជាបានថ្លែងកាលពីម្សិលមិញថា មិនមានពាក្យ«ប្រសិនបើ»ទេ កូដកម្មនឹងត្រូវធ្វើឡើង។

លោកថ្លែងបន្តថា៖ «ខ្ញុំនឹងមិនបោះបង់ផែនការរបស់ខ្ញុំ ក្នុងការធ្វើកូដកម្មនេះនៅថ្ងៃពុធទេ បើទោះបីជាមេដឹកនាំសហជីពដទៃៗទៀត សម្រេចពន្យារពេលរហូតដល់ខែក្រោយក៏ដោយ»។ «ការពន្យារពេលនឹងធ្វើឲ្យចំណាយពេលឥតប្រយោជន៍ និងមានន័យថា យើងនឹងមិនទទួលបានលទ្ធផល»។

អ្នកនាង អៀរ លីម អាយុ ២៥ ឆ្នាំ ជាកម្មការិនីម្នាក់ នៅសួនឧស្សាហកម្មការណាឌីយ៉ា នៅជិតកន្លែងដែលកម្លាំងប្រដាប់អាវុធបានបាញ់មនុស្សយ៉ាងហោចណាស់ ៤ នាក់ស្លាប់ កាលពីថ្ងៃទី៣ ខែមករា គឺជាកម្មករម្នាក់ដែលមិនបោះបង់ផែនការធ្វើកូដកម្មនេះទេ។

អ្នកនាងបានថ្លែងកាលពីម្សិលមិញថា៖ «ខ្ញុំពិតជាភ័យខ្លាច ប៉ុន្តែយើងត្រូវការប្រាក់ខែខ្ពស់ជាងមុន និងអត្ថប្រយោជន៍ច្រើនជាងមុន។ ខ្ញុំនឹងចូលរួមកូដកម្មនេះ។ វាមិនល្អប្រសិនបើយើងពន្យារពេលនោះ»៕ PS

ប្រភពៈ ភ្នំពេញប៉ុសិ៍្ត

អានបន្ត

បក្សទាំងពីរបង្ហាញមូលហេតុនាំឲ្យគ្មានការព្រមព្រៀងគ្នាក្នុងជំនួបម្សិលមិញ

3/11/2014 10:59:00 AM

Unknown

ភ្នំពេញៈ គណបក្សប្រជាជនកម្ពុជា និងគណបក្សសង្គ្រោះជាតិ បានចេញសេចក្តីថ្លែងការណ៍មួយរៀងៗខ្លួន កាលពីម្សិលមិញ ក្រោយពីកិច្ចប្រជុំរយៈពេលបីម៉ោងរបស់គណៈកម្មការចម្រុះស្តីពីកំណែទម្រង់ការបោះឆ្នោតដែលមានសមាសភាព ៦រូបម្ខាង បានបរាជ័យមិនបានឈានដល់កិច្ចព្រមព្រៀងណាមួយទេ។

ក្នុងសេចក្តីថ្លែងការណ៍របស់គណបក្សសង្គ្រោះជាតិបានបំភ្លឺថា ខ្លួនចង់បានស្នើសមាជិក គ.ជ.ប ដែលតម្រូវឲ្យមានការអនុម័តដោយសំឡេងពីរភាគបី នៅក្នុងសភាជាជាងភាគច្រើនដាច់ខាតដែលតម្រូវនាពេលបច្ចុប្បន្ននេះ។ ប៉ុន្តែ សេចក្តីថ្លែងការណ៍របស់គណបក្សប្រជាជនកម្ពុជាវិញ បានបដិសេធត្រង់ចំណុចនេះ និងបានសម្តែងការសោកស្តាយ ចំពោះគណបក្សសង្គ្រោះជាតិ នៅតែយកបញ្ហានេះមកធ្វើជាលក្ខខណ្ឌ ដែលអាចបង្កការរាំងស្ទះដល់ដំណើការកំណែទម្រង់បោះឆ្នោតនាពេលខាងមុខ។

កិច្ចប្រជុំលើក ទី១ នៃគណៈកម្មការនេះ កាលពីថ្ងៃចន្ទសប្តាហ៍មុន ដែលជាកិច្ចខិតខំប្រឹងប្រែងបញ្ចប់ការធ្វើពហិការរបស់គណបក្ស សង្គ្រោះជាតិ មិនចូលសភា បាននាំឲ្យមានការចេញសេចក្តីថ្លែងការណ៍រួមមួយដែលសន្យាធ្វើកំណែ ទម្រង់បញ្ជីអ្នកបោះឆ្នោតនិងសន្យាថា ច្បាប់ស្តីពីហិរញ្ញវត្ថុរបស់គណបក្សនយោបាយនឹងត្រូវបង្កើតឡើង។

ទោះជាលទ្ធផលនៃកិច្ចប្រជុំកាលពីម្សិលមិញមិនមានលទ្ធផល ប៉ុន្តែគណបក្សទាំងពីរ បានសន្យាថានឹង បន្តកិច្ចចរចានេះ នៅថ្ងៃចន្ទ សប្តាហ៍ក្រោយទៀត។

ប្រភពៈ ភ្នំពេញប៉ុសិ៍្ត

អានបន្ត

លោក ម៉ម សូណង់ដូ រិះគន់លោក ហ៊ុន សែន ថារំលោភសិទ្ធិភរិយា

3/11/2014 10:55:00 AM

Unknown

ក្រុមស្ត្រីដែលមានជម្លោះដីធ្លីត្រូវបានអាជ្ញាធរបិទផ្លូវមិនឲ្យចេញទៅសម្តែងមតិ។ រូបថត ហេង ជីរ័ន

ភ្នំពេញៈ «គាត់ [ហ៊ុន សែន] មិនគ្រាន់តែរំលោភច្បាប់ធម្មនុញ្ញនោះទេ ថែមទាំងរំលោភដល់សិទ្ធិរបស់ភរិយា និង កូនស្រីរបស់គាត់ថែមទៀត»។ នេះជាការថ្លែងរបស់លោក ម៉ម សូណង់ដូ នាយកវិទ្យុ សម្បុកឃ្មុំ កាលពីព្រឹកថ្ងៃសៅរ៍ នៅមុខទីលានប្រជាធិបតេយ្យ ដែលហ៊ុមព័ន្ធដោយរនាំងដែកនិង កងកម្លាំងប្រដាប់អាវុធចម្រុះរបស់រដ្ឋាភិបាល។

លោក ម៉ម សូណង់ដូ បានបន្តថា ស្ត្រីទូទាំងពិភពលោកនាំគ្នាអបអរសាទរ ប្រារព្ធខួបលើកទី ១០៣ នៃទិវាសិទ្ធិនារីអន្តរជាតិ។ ដោយឡែកនៅ កម្ពុជា អាជ្ញាធររដ្ឋាភិបាលបែរជារារាំងមិនឲ្យមានការជួបប្រជុំគ្នាប្រារព្ធទិវានេះទៅវិញ។

លោកថ្លែងថា៖ «អ្នកណាមួយក៏មានប្រពន្ធ កូន និង ប្អូនស្រីដែរ ហើយបើសិនជាសម្ដេច ហ៊ុន សែន មិនអនុញ្ញាតឲ្យប្រជាពលរដ្ឋទាំងអស់គ្នា ជួបប្រជុំគ្នាប្រារព្ធទិវាសិទ្ធិនារីនេះ ហាក់ដូចជាសម្តេច ហ៊ុន សែន មិនផ្ដល់កិត្តិយសទៅដល់ប្រពន្ធរបស់គាត់»។

យ៉ាងណាក្ដីការប៉ុនប៉ងធ្វើវេទិកាសាធារណៈនៅលើទីលានប្រជាធិបតេយ្យរបស់ក្រុមសហជីពទាំង ១៨ ដើម្បីទាមទារឲ្យរដ្ឋាភិបាលគិតគូរ អំពីការដំឡើងប្រាក់ឈ្នួលអប្បបរមា ១៦០ ដុល្លារក្នុងមួយខែសម្រាប់កម្មករគ្រប់វិស័យ និងការជំរុញឲ្យមានការដោះលែងមេដឹកនាំសហជីព សកម្មជនសិទ្ធិមនុស្ស និងកម្មករ សរុប ២១នាក់ ដែលកំពុងឃុំខ្លួនក្នុងពន្ធនាគារ ត្រពាំងផ្លុង នោះ ត្រូវបានបរាជ័យដោយសារទីតាំងនោះត្រូវបានក្រុមសមត្ថកិច្ចនគរបាល និងសន្តិសុខ ជាច្រើនរយនាក់ធ្វើការកាន់កាប់និងហ៊ុមព័ទ្ធដោយរនាំងដែក។

លោក សម រង្ស៊ី ប្រធានគណបក្សសង្គ្រោះជាតិ ដែលបានអញ្ជើញទៅចូលរួមគាំទ្រដល់ក្រុមសហជីពបានថ្លែងថា ការជួបប្រជុំគ្នាសម្ដែងមតិនៅថ្ងៃសិទ្ធិនារីអន្តរជាតិគឺជារឿងត្រឹមត្រូវ។

លោកបានថ្លែងថា៖ «នៅថ្ងៃសិទ្ធិនារីអន្តរជាតិនេះ បងប្អូនកម្មករ បានធ្វើការទាមទារស្នើសុំឲ្យមានការដំឡើងប្រាក់ឈ្នួលអប្បបរមា ១៦០ ដុល្លារ ក្នុងមួយខែនិងដោះលែងកម្មករ ២១នាក់ ពីពន្ធនាគារ ត្រពាំងផ្លុង ខ្ញុំសូមគាំទ្រពេញទំហឹងចំពោះការទាមទារទាំងពីរចំណុចនេះ»។

លោក អាត់ ធន់ ប្រធានសហព័ន្ធសហជីព ប្រជាធិបតេយ្យកម្មករកាត់ដេរបានថ្លែងថា ទីលានប្រជាធិបតេយ្យជាកន្លែងសម្រាប់ឲ្យប្រជាពលរដ្ឋ សហជីពកម្មករ និងមន្ត្រីរាជការស៊ីវិល ធ្វើការជួបប្រជុំគ្នាសម្ដែងមតិជុំវិញក្ដីកង្វល់ និងបញ្ហាប្រឈមនានារបស់ខ្លួនដើម្បី បញ្ជូនសារទៅឲ្យរដ្ឋាភិបាលជួយដោះស្រាយ។ ប៉ុន្តែជាអកុសលនៅថ្ងៃទិវាសិទ្ធិនារីអន្តរជាតិនេះទីតាំងនេះត្រូវបានហាមឃាត់មិនឲ្យមានការជួបប្រជុំគ្នានិង ដាក់ពង្រាយដោយកម្លាំងប្រដាប់អាវុធចម្រុះរបស់រដ្ឋាភិបាលទៅវិញ។

លោកថ្លែងថា៖ «នេះជាការបំបិទសិទ្ធិសេរីភាពនៃការបញ្ចេញមតិរបស់ពលរដ្ឋយ៉ាងធ្ងន់ធ្ងរ។ យើងជាកម្មករមិនត្រូវបានគេផ្ដល់សិទ្ធិឲ្យមានការជួបប្រជុំបញ្ចេញនូវក្ដីកង្វល់របស់ខ្លួន មិនឲ្យតវ៉ាធ្វើកូដកម្មប៉ុន្តែរដ្ឋាភិបាលនិង ម្ចាស់រោងចក្រក៏មិនផ្ដល់ដំណោះស្រាយឲ្យយើងខ្ញុំដែរ តើឲ្យយើងខ្ញុំធ្វើដូចម្ដេចចាត់ទុកពួកយើងខ្ញុំ និងកម្មករជាអ្វី?»។

លោក អាត់ ធន់ បានបន្តថា កម្មករកម្មការិនីនៅគ្រប់បណ្ដារោងចក្រទាំងអស់ទូទាំងប្រទេស បានឯកភាពគ្នាហើយថា បើនៅតែមិនដោះស្រាយឲ្យពួកគាត់ទេនោះ ពួកគាត់នឹងធ្វើកូដកម្មមិនទៅធ្វើការមួយសប្ដាហ៍ ដោយរាប់ចាប់ពីថ្ងៃ ទី១២ រហូតដល់ថ្ងៃ ទី១៩ ខែ មីនា នេះ។

ជាមួយគ្នានេះដែរ អ្នកស្រី កេន ឆេងឡាង អនុប្រធានសហព័ន្ធជាតិ នៃឧស្សាហកម្មវាយនភ័ណ្ឌកាត់ដេរ កម្ពុជា បាននិយាយថា នៅថ្ងៃទិវាសិទ្ធិនារីអន្តរជាតិកម្មករ កម្មការិនីរោងចក្រសហគ្រាសចង់ជួបជុំគ្នាអំពាវនាវ និង ជំរុញឲ្យរដ្ឋាភិបាលដោះលែង បងប្អូន និងប្ដីរបស់ពួកគេ ដែលកំពុងជាប់ឃុំទាំងអយុត្តិធម៌ នៅគុក ត្រពាំងផ្លុង និងទាមទារឲ្យមានការដំឡើងប្រាក់ឈ្នួល ១៦០ ដុល្លារ ប៉ុន្តែអ្វីៗត្រូវបានរារាំងនិងទប់ស្កាត់ដោយកម្លាំងអាជ្ញាធររដ្ឋាភិបាល។

អ្នកស្រីថា៖ «ប្រមុខរដ្ឋាភិបាលតែងតែប្រកាសជារឿយៗថា មន្ត្រីគ្រប់ស្ថាប័នទាំងអស់ត្រូវរួមគ្នាអនុវត្តគោលនយោបាយលើកកម្ពស់សិទ្ធិស្ត្រី ប៉ុន្តែនៅថ្ងៃសិទ្ធិនារីយើងខ្ញុំ ស្ត្រីមិនត្រូវបានអាជ្ញាធររដ្ឋាភិបាលអនុញ្ញាតឲ្យបញ្ចេញមតិ»។

អ្នកស្រី ប្រាក់ សុវណ្ណារី ភរិយាលោក វន់ ពៅ បាននិយាយថា៖ «ខ្ញុំមកនេះគឺចង់អំពាវនាវឲ្យអាជ្ញាធររដ្ឋាភិបាលដោះលែងប្ដីរបស់ខ្ញុំ ព្រោះគាត់មិនបានប្រព្រឹត្តកំហុសដូចការចោទប្រកាន់នោះទេ។ ប្ដីរបស់ខ្ញុំកំពុងមានជំងឺធ្ងន់ធ្ងរដែលចាំបាច់ត្រូវធ្វើការព្យាបាលជាបន្ទាន់»។

គួរបញ្ជាក់ផងដែរថា នៅវេលាម៉ោងជាង ៧ ព្រឹកអ្នកធ្វើដំណើរនិងក្រុមសកម្មជនសហជីពមួយចំនួនត្រូវបានក្រុមសន្តិសុខសណ្ដាប់ធ្នាប់ខណ្ឌ ដូនពេញ សំឡុតបំភ័យ និងវាយបណ្ដេញចេញពីកន្លែងស្ពាននាគ។ ក្នុងអំឡុងពេលនោះសកម្មជនសហជីពបួនប្រាំនាក់ ត្រូវបានក្រុមសន្តិសុខដេញវាយ និង ហក់ធាក់ ខណៈពួកគេបានតមាត់នឹងក្រុមសន្តិសុខទាំងនោះដោយនិយាយថា គ្រាន់តែដើរកាត់មិនបានឬអី?

បន្ទាប់មកគេឃើញក្រុមសហជីព និងពលរដ្ឋមកពីសហគមន៍ដីធ្លីមួយចំនួនបាននាំគ្នាមកកាន់តែច្រើនឡើងៗ រហូតដល់ជាង ៥០០ នាក់ធ្វើឲ្យក្រុមសន្តិសុខដកថយពីសួនស្ពាននាគទៅក្នុងទីលានប្រជាធិបតេយ្យ ដែលមានកម្លាំងប្រដាប់អាវុធចម្រុះប្រមាណ ៥០០ នាក់ប្រដាប់ដោយខែល និងដំបងឆក់។

ដោយឡែកក្រុមអ្នកភូមិ បឹងកក់ ជាង ២០០ នាក់ដែលប៉ុនប៉ងហែក្បួនមកចូលរួមជាមួយនឹងក្រុមសហជីពនៅឯស្ពាននាគនោះ ត្រូវបានកម្លាំងនគរបាលចម្រុះដាក់រនាំងដែកបិទផ្លូវចេញចូលមិនឲ្យពួកគេចេញពីតំបន់ បឹងកក់ ឡើយខណៈរ៉ឺម៉ក Tuk-Tuk និងរថយន្តដឹកកម្មករមួយចំនួនត្រូវក្រុមសហជីពអះអាងថា អាជ្ញាធរហាមឃាត់មិនឲ្យមកកាន់តំបន់ទីលានប្រជាធិបតេយ្យឡើយ៕

ប្រភពៈ ភ្នំពេញប៉ុសិ៍្ត

អានបន្ត

Monday, March 10, 2014

ក្រុមហ៊ុនបញ្ជាទិញអាមេរិកស្នើកម្ពុជាដោះស្រាយប្រាក់ឈ្នួលឲ្យបានឆាប់

3/10/2014 04:24:00 PM

Unknown

ភ្នំពេញៈ ក្រុមហ៊ុនបញ្ជាទិញសំលៀកបំពាក់ពីកម្ពុជារបស់សហរដ្ឋអាមេរិកគឺក្រុមហ៊ុន LevI Srtauss & CO បានជួបពិភាក្សាការងារជាមួយរដ្ឋមន្ត្រីក្រសួងការងារកម្ពុជាដោយស្នើឲ្យកម្ពុជាដោះស្រាយបញ្ហាប្រាក់ឈ្នួលរបស់កម្មករឲ្យបានឆាប់ដើម្បីឲ្យវិស័យមួយនេះមានដំណើរការប្រក្រតី។

នៅក្នុងជំនួបជាមួយរដ្ឋមន្ត្រីក្រសួងការងារនៅព្រឹកថ្ងៃទី ០៧ ខែមីនាឆ្នាំ ២០១៤ នៅទីស្តីការក្រសួង លោក Michael KoborI អគ្គនាយករងក្រុមហ៊ុន LevI Srtauss & Co បានថ្លែងថា លោកសង្ឃឹមថាបញ្ហាជម្លោះលើប្រាក់ឈ្នួលនឹងត្រូវបានដោះស្រាយក្នុងពេលខាងមុខឲ្យបានឆាប់ដើម្បីពង្រឹងទំនុកចិត្តលើអ្នកបញ្ជាទិញក្នុងការវិនិយោគនៅប្រទេសកម្ពុជា ព្រោះកន្លងមកមានបាតុកម្មជាច្រើនទាមទារឲ្យដំឡើងប្រាក់ឈ្នួល ១៦០ ដុល្លារសហរដ្ឋអាមេរិកក្នុងមួយខែ។

លោកថា «អំឡុងពេលបាតុកម្មថ្មីនេះៗទំនិញពីកម្ពុជាបានធ្លាក់ចុះមួយកម្រិតលើទីផ្សារអន្តរជាតិ ហើយ ក្រុមហ៊ុនរបស់លោកគាំទ្រចំពោះដំណោះស្រាយរបស់រាជរដ្ឋាភិបាលក្នុងការដោះស្រាយពីបញ្ហានេះ»។

ថ្លែងនៅក្នុងឱកាសជំនួបនោះ លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈថ្លែងថា លោកមានការព្រួយបារម្ភចំពោះសហជីពមួយចំនួនញុះញង់ឲ្យកម្មករធ្វើបាតុកម្មដែលនាំឲ្យមានការខាតប្រយោជន៍ទាំងកម្មករ និង និយោជក។

យ៉ាងណាក៏ដោយរដ្ឋាភិបាលកំពុងយកចិត្តដាក់ដោះស្រាយបញ្ហានេះដើម្បីស្តារសេ្ថរភាពវិស័យឆ្អឹងខ្នងមួយនេះឲ្យប្រសើរឡើងវិញ។

លោកថា «យើងកំពុងសិក្សាពីរូបមន្តក្នុងការដំឡើងបន្តទៀតដល់កម្មករ»។

នៅថ្ងៃទី ០៨ មីនា ទិវាសិទ្ធិនារីអន្តរជាតិនេះ ក្រុមសហជីពកម្មករ នឹងធ្វើការជួបជុំគ្នា នៅទីលានប្រជាធិបតេយ្យ ដើម្បីអបអរសាទរទិវាសិទិ្ធនារីអន្តរជាតិនិងពិភាក្សាអំពីបញ្ហាបន្ទាន់ ក្នុងឧស្សាហកម្មកាត់ដេរ ទោះបីជាអាជ្ញាធររាជធានីភ្នំពេញ មិនអនុញ្ញាតក៏ដោយ។

ប្រភពៈ ភ្នំពេញប៉ុសិ៍្ត

អានបន្ត

Monday, February 24, 2014

ធនាគារពិភពលោក៖ ភាពក្រីក្រនៅកម្ពុជាថយចុះមកត្រឹម២០%

2/24/2014 09:47:00 AM

Unknown

ធនាគារពិភពលោក (World Bank) បានប្រកាសរបាយការណ៍វាយតម្លៃភាពក្រីក្ររបស់កម្ពុជា នៅថ្ងៃទី២០ កុម្ភៈ ថាមានការថយចុះមកត្រឹម ២០% នាពេលបច្ចុប្បន្ន។ ការថយចុះនេះ ដោយសារតែកត្តាសំខាន់មួយចំនួន ដូចជាថ្លៃកសិផលមានតម្លៃខ្ពស់ កំណើនអត្រាប្រាក់ឈ្នួលនៅជនបទ និងកំណើនចំណូលមុខរបរតូចតាច។ ប៉ុន្តែ អត្រាភាពក្រីក្រនឹងកើនទ្វេដងវិញ នៅពេលប្រជាពលរដ្ឋនោះបាត់បង់ចំណូលប្រមាណ ១.២០០រៀលក្នុងមួយថ្ងៃ។

កម្ពុជា ជាប្រទេសមួយក្នុងចំណោមប្រទេសជាច្រើនដែលអនុវត្តបានល្អ ក្នុងការកាត់បន្ថយភាពក្រីក្រនៅលើពិភពលោកនាប៉ុន្មានឆ្នាំថ្មីៗ កន្លងមកនេះ។

របាយការណ៍វាយតម្លៃភាពក្រីក្រចុងក្រោយរបស់ធនាគារពិភពលោក ប្រចាំកម្ពុជា បានបង្ហាញនៅថ្ងៃព្រហស្បតិ៍ ទី២០ កុម្ភៈ រកឃើញថា ប្រជាពលរដ្ឋកម្ពុជា មានជីវភាពកាន់តែប្រសើរជាងមុន ដោយសារតែពួកគាត់មានទ្រព្យសម្បត្តិប្រើប្រាស់ក្នុងផ្ទះបានកើនឡើង ដូចជាទូរទស្សន៍ ម៉ូតូ និងមានទូរស័ព្ទប្រើប្រាស់។

បច្ចុប្បន្ន គ្រួសារមានទូរទស្សន៍ប្រើប្រាស់បានកើនឡើងប្រមាណ ៤ដង គ្រួសារអ្នកមានម៉ូតូកើនឡើងចំនួនពីរដង បើប្រៀបធៀបនឹងឆ្នាំ២០០៧។

ប្រធានធនាគារពិភពលោក ប្រចាំកម្ពុជា លោក អាឡាសាន សូ (Alasan So) មានប្រសាសន៍នៅក្នុងការផ្សព្វផ្សាយរបាយការណ៍វាយតម្លៃភាពក្រីក្រ នោះថា កំណើនសេដ្ឋកិច្ចកម្ពុជា រឹងមាំ និងមានកំណើនខ្លាំង បានជួយជំរុញឲ្យអត្រាភាពក្រីក្របានថយចុះ គួរឲ្យកត់សម្គាល់នាពេលបច្ចុប្បន្ន៖ «សេដ្ឋកិច្ចកម្ពុជា សម្រេចបាននូវកំណើនគួរឲ្យកត់សម្គាល់ ដែលជាលទ្ធផលឈានដល់ការកាត់បន្ថយភាពក្រីក្របានចំនួនពាក់កណ្ដាល ដែលថយចុះពីចំនួន ៥០% នៅឆ្នាំ២០០៤ ដល់ ២០% នាពេលបច្ចុប្បន្ន»។

មានមូលហេតុជាច្រើនដែលជំរុញឲ្យអត្រាភាពក្រីក្រនៅកម្ពុជា បានថយចុះ។ របាយការណ៍វាយតម្លៃភាពក្រីក្រ បានរកឃើញកត្តាសំខាន់បំផុតចំនួនពីរ គឺតម្លៃស្រូវ និងផលិតកម្មស្រូវបានកើនឡើង ដែលជំរុញឲ្យចំណូលកសិករកើនឡើង។ ទីពីរ ការកើនឡើងប្រាក់ឈ្នួលលើវិស័យកសិកម្ម។

បន្ថែមលើនេះ ប្រជាពលរដ្ឋកម្ពុជា ប្រមាណ ៣លាន ៥សែននាក់ ធ្វើចំណាកស្រុក ដើម្បីរកចំណូលពីតំបន់មួយទៅតំបន់មួយ។ ចំណូលប្រចាំថ្ងៃរបស់ប្រជាពលរដ្ឋទាំងនោះ បានកើនឡើងរហូតដល់ ៦.២០០រៀលនាពេលបច្ចុប្បន្ន ដែលនៅឆ្នាំ២០០៧ មានចំនួនតែ ៤.១០០រៀលតែប៉ុណ្ណោះ។ ប៉ុន្តែរបាយការណ៍របស់ធនាគារពិភពលោក ដដែលនោះ ក៏បានគូសបញ្ជាក់ទៀតថា ចំពោះការចំណាយជាមធ្យមរបស់ប្រជាពលរដ្ឋនៅជនបទវិញបានកើនឡើងដល់ ចំនួន ៨.២០០ក្នុងមួយថ្ងៃ។

ប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ លោក គាត ឈន់ មានប្រសាសន៍ថា គ្រួសារភាគច្រើនដែលរួចចាកផុតពីភាពក្រីក្រ ក៏នៅតែងាយរងគ្រោះ និងអាចធ្លាក់ចូលទៅក្នុងអន្ទាក់ភាពក្រីក្រវិញសាជាថ្មី។ ក្រុមអ្នកងាយរងគ្រោះទាំងនោះមានប្រមាណ ៣លាននាក់។ លោកបញ្ជាក់ទៀតថា ដើម្បីការពារដល់អ្នករងគ្រោះទាំងនោះ រដ្ឋាភិបាលនឹងបន្តយុទ្ធសាស្ត្រគាំពារសង្គមរបស់ខ្លួន។

ទោះជាយ៉ាងណាក៏ដោយ បច្ចុប្បន្នក្នុងចំណោមប្រជាពលរដ្ឋកម្ពុជា ១០នាក់ មានពីរនាក់ជាអ្នកក្រ ដោយផ្អែកលើនិយមន័យ ១ដុល្លារ ១៥សេនក្នុងមួយថ្ងៃ។

បន្ថែមលើនេះ ធនាគារពិភពលោក ប្រចាំកម្ពុជា បានរកឃើញថា ចំនួនប្រជាពលរដ្ឋដែលស្ថិតនៅក្បែរបន្ទាត់ភាពក្រីក្រ ដែលរស់មានចំណូលតិចជាង ២ដុល្លារ ៣០សេនក្នុងមួយថ្ងៃ មានចំនួនជាង ៨លាននាក់។ ក្រុមនេះជាអ្នកងាយនឹងធ្លាក់ចូលភាពក្រីក្រវិញ នៅពេលដែលចំណូលរបស់គាត់បាត់បង់ប្រមាណ ១.២០០រៀលក្នុងមួយថ្ងៃ ដែលបញ្ហានេះនឹងធ្វើឲ្យអត្រាភាពក្រីក្រកើនឡើងដល់ ៤០% វិញ៕

ប្រភព អាស៊ីសេរី

អានបន្ត

Monday, January 6, 2014

ស្រ្តីជាសកម្មជនដីធ្លី៥នាក់បានត្រូវដោះលែងវិញហើយ

1/06/2014 05:11:00 PM

Sam

ស្ត្រីជាសកម្មជនដីធ្លី មកពីសហគមន៌បឹងកក់ ដែលត្រូវបានសមត្ថកិច្ចចាប់ខ្លួនកាលពីព្រឹកថ្ងៃទី ៦ មករា ២០១៤ ត្រូវបានដោះលែងវីញហើយនៅរសៀលថ្ងៃដដែលក្រោមកិច្ចអន្តរាគមន៌ពី ស្ថាប័នសិទ្ធឹមនុស្ស និងអង្គការសហប្រជាជាតិ។

ប្រភពពត៌មានបានប្រាប់ឲ្យដឹងថា ចំពោះមូលហេតុនៃការដោះលែងនោះ នៅពុំទាន់បានទំលាយឲ្យដឹងនោះទេ។ សកម្មជនដីធ្លីមកពីសហគមន៌អ្នកភូមិបឹងកក់ ចំនួន៥នាក់ជាស្រ្តីត្រូវបានសមត្ថកិច្ចចាប់ខ្លួននៅខាងមុខស្ថានទូ តបារាំងកាលពីព្រឹកថ្ងៃទី ៦ មករា ២០១៤ នៅពេលដែលស្រ្តីទាំងនោះឈរស្រែកទាមទារឲ្យដោះលែងក្រុមកម្មករដែល ត្រូវបានចាប់ខ្លួន។

ស្រ្តីទាំង៥នាក់នោះមាន អ្នកស្រីទេព វនី្ន អ្នកស្រី យ៉ោម បុប្ផា អ្នកស្រី សុង ស្រីលាភ អ្នកស្រីផាន់ ឈុនវ៉េត និង អ្នកស្រី បូ ឆវី ដែលទាំង៥នាក់សុទ្ធឹសឹងជាអ្នកដឹកនាំសហគមន៌អ្នកភូមិបឹងកក់ដែល ត្រូវបានគេបណ្តេញចេញ។ ក្រោយឃាត់ខ្លួន សកម្មជនដីធ្លីទាំង ៥នាក់ ត្រូវបានបញ្ជូនទៅឃុំខ្លួននៅស្នងការដ្ឋាននគរបាលរាជធានីភ្នំពេញ។

ការចាប់ខ្លួននេះ បានធ្វើឡើងនាព្រឹកថ្ងៃចន្ទ ទី០៦ ខែមករា ឆ្នាំ២០១៤នេះ នៅក្បែរមន្ទីរពេទ្យកាល់ម៉ែត្រ ក្នុងសង្កាត់ ស្រះចក ខណ្ឌដូនពេញ នៅពេលដែលក្រុមសកម្មជនដីធ្លី មកពីសហគមន៌បឹងកក់ទាំងនេះ កំពុងប្រមូលផ្តុំគ្នា នៅជិតស្ថានទូតបារាំង៕

ស្ត្រីសកម្មជនទាំង៥នាក់កាលព្រឹកថ្ងៃទី ៦ មករា ២០១៤

ប្រភពៈ neavea

អានបន្ត

Thursday, January 2, 2014

រាជរដ្ឋាភិបាលបានសំរេចបង្កើតខណ្ឌថ្មីចំនួន៣ ចំណុះឲ្យរាធានីភ្នំពេញជាផ្លូវការ

1/02/2014 11:07:00 AM

Unknown

រាជរដ្ឋាភិបាលកម្ពុជា បានសំរេចចេញអនុក្រិត្យបង្កើតខណ្ឌ ចំនួន ៣ បន្ថែមទៀត ចំណុះឲ្យរាធានីភ្នំពេញជាផ្លូវការហើយ។ ខណ្ឌទាំង៣ នោះរួមមាន៖ ខណ្ឌជ្រោយចង្វារ, ខណ្ឌព្រែកព្នៅ និងខណ្ឌច្បារអំពៅដូច្នេះនៅរាធានីភ្នំពេញមានសរុប ចំនួន ១២ ខណ្ឌរួមទាំងខណ្ឌដែលមានស្រាប់ ចំនួន ៩ ខណ្ឌរួមមាន៖ ខណ្ឌចំការមន, ខណ្ឌ៧ មករា, ខណ្ឌមានជ័យ ,ខណ្ឌឬស្សីកែវ ,ខណ្ឌទួលគោក, ខណ្ឌសែនសុខ, ខណ្ឌពោធិ៍សែន ជ័យ និងខណ្ឌដង្កោ។

តាមអនុក្រិត្យរបស់រាជរដ្ឋាភិបាលបានបញ្ជាក់ថា ក្នុងចំណោមខណ្ឌ ចំនួន ៣ នោះ គឺ ខណ្ឌជ្រោយចង្វារមាន ចំនួន ៥ សង្កាត់គឺ សង្កាត់ជ្រោយចង្វារ, សង្កាត់ព្រែកលៀប ,សង្កាត់ព្រែកតាសេក, សង្កាត់កោះដាច់ និងសង្កាត់បាក់ខែង។ ខណ្ឌព្រែកព្នៅ មាន៥ សង្កាត់គឺ សង្កាត់ព្រែកព្នៅ, សង្កាត់ពញាពន់, សង្កាត់សំរោង, សង្កាត់គោករកា និងសង្កាត់ពន្សាំង ។ចំណែក ខណ្ឌច្បារអំពៅមាន៨ សង្កាត់ គឺសង្កាត់ច្បារអំពៅទី១, សង្កាត់ច្បារអំពៅទី២, សង្កាត់និរោធ, សង្កាត់ព្រែកប្រា ,សង្កាត់វាលស្បូវ, សង្កាត់ព្រែកឯង, សង្កាត់ក្បាលកោះ និងសង្កាត់ព្រែកថ្មី៕

ប្រភព សម្លេងសារព័ត៏មានសេរី

អានបន្ត

Wednesday, January 1, 2014

ប័ណ្ណប្រកាស ធនប័ត្រ "អនុស្សាវរីយ៍" ប្រភេទ ២០០០ រៀល

1/01/2014 01:08:00 PM

Sam

ប្រភពៈ ធនាគារជាតិនៃកម្ពុជា

អានបន្ត

Tuesday, December 31, 2013

សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី៣០ ខែធ្នូ ឆ្នាំ២០១៣

12/31/2013 11:04:00 AM

Sam

ប្រភពៈ SKD168

អានបន្ត

លិខិតរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈព្រមានប្រធានសហជីពទាំង៥នៅកម្ពុជាដែល បានញុះញង់កម្មករឲ្យធ្វើបាតុកម្មនិងបំផ្លាញទ្រព្យសម្បត្តិរោងចក្រ

12/31/2013 11:02:00 AM

Sam

ប្រភពៈ SKD168

អានបន្ត

លិខិតរបស់លោកឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីជម្រាបជូនលោក រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ

12/31/2013 11:01:00 AM

Sam

ប្រភពៈ SKD168

អានបន្ត

វេទិកានិពន្ធនាយកលើកទី១០ស្តីពីការពិភាក្សាបង្កើតក្រុមប្រឹក្សា សារព័ត៌មានជាតិនិងអនុសាសន៍សម្រាប់បង្កើតច្បាប់ស្តីពីសិទ្ធិទទួល ព័ត៌មាន

12/31/2013 10:58:00 AM

Sam

ភ្នំពេញ ៖ នៅថ្ងៃទី៣០ ខែធ្នូ ឆ្នាំ២០១៣ នៅសណ្ឋាគារកាំបូឌីយ៉ាណាមានរៀបចំវេទិកានិពន្ធនាយកលើកទី១០ស្តី ពីការពិភាក្សាបង្កើតក្រុមប្រឹក្សាសារព័ត៌មានជាតិនិងអនុសាសន៍ សម្រាប់បង្កើតច្បាប់ ស្តីពីសិទ្ធិទទួលព័ត៌មានរៀបចំដោយក្លិប អ្នកកាសែតកម្ពុជាដោយមានការចូលរួមពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន សមាគមអ្នកកាសែតនានាជាច្រើន រួមនឹងថ្នាក់ដឹកនាំបណ្តាញព័ត៌មាន កាសែត ទស្សនាវដ្តី វិទ្យុ ទូរទស្សន៍ គេហទំព័រ និងបណ្តាញអេឡិចត្រូនិកជាច្រើន ។

ឆ្លងតាមការពិភាក្សាអស់រយៈពេលមួយព្រឹក របស់អ្នកយកព័ត៌មានទាំងអស់ នៅកម្ពុជាមានចំណាប់អារម្មណ៍ចំពោះ សេចក្តីព្រាងច្បាប់ស្តីពីសិទ្ធិទទួលព័ត៌មានដែល នឹងត្រូវធ្វើឡើង នៅពេលខាងមុខនេះ ហើយក្នុងនោះអ្នកយកព័ត៌មានបានសំណូមពរដល់គណៈកម្មការរៀបចំច្បាប់ ស្តីពីសិទ្ធិទទួលព័ត៌មាន មានចំណាប់អារម្មណ៍លើកត្តាសំខាន់មួយចំនួន ដែលអ្នកកាសែតបានអនុវត្តនិងប្រឈមចំពោះមុខនាពេលបច្ចុប្បន្ននេះ ។ ក្នុងនោះមានសំណូមពរ ១៦ចំណុច យ៉ាងសំខាន់សម្រាប់គណៈកម្មការតាត់តែង ច្បាប់ស្តីពីសិទ្ធិទទូលព័ត៌មាន ។

នៅវេលារសៀលថ្ងៃដដែលក្នុងពិធី បិទវេទិកានិពន្ធនាយកលើកទី១០លោករដ្ឋមន្ត្រីក្រសួងព័ត៌មានបានសន្យា នាំយកសំណូមពរទាំងអស់នេះ ទៅធ្វើការពិចារណាដើម្បីឲ្យគណៈកម្មការ កាត់តែងច្បាប់ត្រិះរិះពិចារណា ។ ក្នុងនោះដែរលោករដ្ឋមន្ត្រីបានបញ្ជាក់ថា ការតាក់តែងច្បាប់នេះធ្វើឡើងរយៈពេល៣ឆ្នាំយ៉ាងតិចទើបអនុម័តជា ស្ថាពរបែបណានោះ ៕

ប្រភពៈ SKD168

អានបន្ត

Friday, December 27, 2013

កម្ពុជានឹងចុះអនុស្សរណៈជាមួយវៀតណាមលើរបៀបវារៈ៩ចំណុច

12/27/2013 08:10:00 AM

Unknown

ភ្នំពេញ ៖ ឆ្លើយតបនឹងការអញ្ជើញរបស់លោក ង្វៀន តាន់យ៉ុង នាយករដ្ឋ មន្ដ្រីសាធារណរដ្ឋសង្គម និយមវៀត ណាម កាលពីព្រឹកថ្ងៃទី២៦ ខែធ្នូ ឆ្នាំ ២០១៣ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះ រាជាណាចក្រកម្ពុជា និងសម្ដេចកិត្ដិព្រឹទ្ធ បណ្ឌិត ប៊ុន រ៉ានី ហ៊ុន សែន បានដឹកនាំ គណៈប្រតិភូជាន់ខ្ពស់រាជរដ្ឋាភិបាលទៅ បំពេញទស្សនកិច្ចផ្លូវការនៅសាធារណ រដ្ឋសង្គមនិយមវៀតណាមចាប់ពីថ្ងៃទី ២៦ ថ្ងៃទី២៨ ខែធ្នូ ឆ្នាំ២០១៣ ។

លោក ស្រ៉ី ថាមរុង្គ រដ្ឋមន្ដ្រីប្រតិភូ អមនាយករដ្ឋមន្ដ្រីបានប្រាប់ឱ្យដឹងថា គណៈប្រតិភូអមដំណើរមានលោកឧប នាយករដ្ឋមន្ដ្រី ហោ ណាំហុង, លោក ទេសរដ្ឋមន្ដ្រី វ៉ា គឹមហុង, លោកទេស រដ្ឋមន្ដ្រី ស៊ុន ចាន់ថុល, លោករដ្ឋមន្ដ្រី អង់ វង្សវឌ្ឍនា, លោករដ្ឋមន្ដ្រី ខៀវ កាញារីទ្ធ, លោករដ្ឋមន្ដ្រី អូន ព័ន្ធមុនីរ័ត្ន, លោករដ្ឋមន្ដ្រី ហង់ ជួនណារ៉ុន និងរដ្ឋ មន្ដ្រីប្រតិភូអមនាយករដ្ឋមន្ដ្រីលោក សុខ ចិន្ដា, លោកស្រ៉ី ថាមរុង្គ និងលោក កៅ គឹមហួន ព្រមទាំងសមាជិករាជរដ្ឋា ភិបាលមួយចំនួនទៀត ។

តាមកម្មវិធីលោក ស្រ៉ី ថាមរុង្គ បាន បញ្ជាក់ថា ក្រោយពីទៅដល់ព្រលានយន្ដ ហោះ សម្ដេចតេជោនាយករដ្ឋមន្ដ្រី និង គណៈប្រតិភូអញ្ជើញទៅកាន់វិមាន ប្រធានរដ្ឋដើម្បីប្រារឰពិធីស្វាគមន៍ផ្លូវ ការពីភាគីវៀតណាម ។ បន្ទាប់មកនឹង មានការចរចាទ្វេភាគីជាផ្លូវការជាមួយ លោកនាយករដ្ឋមន្ដ្រីវៀតណាមនៅ វិមានរដ្ឋាភិបាល ។

នៅពេលរសៀលសម្ដេចតេជោនាយក រដ្ឋមន្ដ្រីនឹងដឹកនាំគណៈប្រតិភូចូលរួម ជួបសម្ដែងការគួរសមជាមួយប្រធាន រដ្ឋសភាវៀតណាម, ជួបសម្ដែងការគួរ សមជាមួយប្រធានរដ្ឋវៀតណាម និង ជួបជាមួយអគ្គលេខាធិការបក្សកុម្មុនិស្ដ វៀតណាម ។

នៅពេលយប់លោកនាយករដ្ឋមន្ដ្រី សាធារណរដ្ឋសង្គមនិយមវៀតណាម នឹងរៀបចំពិធីជប់លៀងផ្លូវការជូនសម្ដេច តេជោនាយករដ្ឋមន្ដ្រី និងសម្ដេចកិត្ដិ ព្រឹទ្ធបណ្ឌិត និងគណៈប្រតិភូកម្ពុជា ។ នៅថ្ងៃទី២៧ ខែធ្នូ ឆ្នាំ២០១៣ សម្ដេច តេជោនាយករដ្ឋមន្ដ្រីនឹងដឹកនាំគណៈ ប្រតិភូចូលរួមសម្ដែងការគួរសមជាមួយ លោកអតីតលេខាធិការបក្សកុម្មុយនិស្ដវៀតណាម ចូលជួបសម្ដែងការគួរសម ជាមួយអតីតប្រធានរដ្ឋវៀតណាម ។

នៅក្នុងដំណើរបំពេញទស្សកិច្ចផ្លូវ ការនៅសាធារណរដ្ឋសង្គមនិយមវៀត ណាមនេះដែរសម្ដេចតេជោមានកម្មវិធី ជួបសំណេះសំណាលជាមួយអតីតយុទ្ធ ជនស្ម័គ្រចិត្ដវៀតណាមដែលបានមក ជួយរំដោះប្រទេសកម្ពុជានៅថ្ងៃទី៧ មករា ១៩៧៩ ។ នៅថ្ងៃដដែលនោះដែរ សម្ដេចតេជោក៏បានជួបជាមួយសមាគម អ្នកវិនិយោគវៀតណាមដែលមករកស៊ី នៅកម្ពុជា និងទទួលជួបជាមួយសមាគម មិត្ដភាពវៀតណាម-កម្ពុជាដែលភាគី កម្ពុជាដឹកនាំដោយលោកស្រីឧបនាយក រដ្ឋមន្ដ្រី ម៉ែន សំអន និងភាគីវៀត ណាមដឹកនាំដោយលោក វូ ម៉ៅ ។

បន្ទាប់ពីកិច្ចចរចាទ្វេភាគីរវាង សម្ដេចតេជោជាមួយនាយករដ្ឋមន្ដ្រី សាធារណរដ្ឋសង្គមនិយមវៀតណាមនឹង ធ្វើជាសាក្សីចុះហត្ថលេខាលើកិច្ចព្រម ព្រៀង MOU មានចំនួន៩ក្នុងនោះមានៈ

១-កិច្ចព្រមព្រៀងស្ដីពីការផ្លាស់ប្ដូរ ទំនិញវៀតណាម-កម្ពុជា ។

២-កិច្ចសម្របសម្រួលពាណិជ្ជកម្ម ទ្វេភាគីឆ្នាំ២០១៤-២០១៥ ដែលទាក់ ទងនឹងទំហំពាណិជ្ជកម្មរវាងកម្ពុជាមាន ជាង៣ពាន់លានដុល្លារ ហើយប្ដេជ្ញាជំរុញឱ្យមានទំហំ៥ពាន់លានដុល្លារនៅ ឆ្នាំ២០១៥ ។

៣-សន្ធិសញ្ញាស្ដីពីបត្យាប័នផ្លាស់ប្ដូរ។

៤-ផែនការសហប្រតិបត្ដិការស្ដីពី ព័ត៌មានសម្រាប់ឆ្នាំ២០១៤-២០១៥ ។

៥-កិច្ចព្រមព្រៀងឥណទានសម្រាប់សាងសង់ស្ពានជ្រៃធំ-ភ្នំពេញដែលចាប់ស្ថាបនានៅដើមឆ្នាំ២០១៤នៅស្រុក កោះធំ ខេត្ដកណ្ដាល ។

៦-ផែនការសកម្មភាពលើវិស័យអប់រំ។

៧-ផែនការសហប្រតិបត្ដិការរវាង ក្រសួងមហាផ្ទៃកម្ពុជានឹងនគរបាលវៀត ណាម ។

៨-ផែនការសហប្រតិបត្ដិការរវាង បណ្ដាប័ណ្ណសរសើរវិទ្យាស្ថានជាតិ សាកលវិទ្យាល័យកិច្ចការផ្ទៃក្នុងហាណូយ និងទីស្ដីការគណៈរដ្ឋមន្ដ្រី ។

៩-កិច្ចព្រមព្រៀងទិញជីកសិកម្ម ។

នៅល្ងាចថ្ងៃទី២៧ ខែធ្នូ ឆ្នាំ២០១៣ សម្ដេចតេជោ សម្ដេចកិត្ដិព្រឹទ្ធបណ្ឌិត និងគណៈប្រតិភូជាតិអញ្ជើញទស្សនកិច្ច នៅទីក្រុង ជាណាង លោកអភិបាលខេត្ដ ដាឈាង ទទួលបដិសណ្ឋារកិច្ច និងរៀបចំពិធីជប់លៀងជូនជាកិត្ដិយសចំពោះ សម្ដេចតេជោ សម្ដេចកិត្ដិព្រឹទ្ធបណ្ឌិត និងគណៈប្រតិភូកម្ពុជាផងដែរ ។

នៅថ្ងៃទី២៨ ខែធ្ន្នូ ឆ្នាំ២០១៣ សម្ដេចតេជោ សម្ដេចកិត្ដិព្រឹទ្ធបណ្ឌិត និងគណៈ ប្រតិភូកម្ពុជាអញ្ជើញទស្សនាទីក្រុង តាមរថយន្ដ បន្ទាប់មកទៅកាន់ព្រលាន យន្ដហោះធ្វើមាតុភូមិនិវត្ដន៍មកកាន់កម្ពុជាវិញ ៕

ប្រភព សម្លេងសារព័ត៏មានសេរី

អានបន្ត

Friday, December 20, 2013

អន្ទាក់សត្វរាប់រយត្រូវគេរកឃើញក្នុងជម្រកសត្វព្រៃលំផាត់

12/20/2013 03:43:00 PM

Unknown

ព្រៃឈើនិងសត្វព្រៃក្នុងដែនជម្រកសត្វព្រៃលំផាត់ ខេត្តរតនគិរី កំពុងរកការបំផ្លាញធ្ងន់ធ្ងរបន្តទៀតដោយសារសកម្មភាពកាប់យកឈើមានតម្លៃ និងសកម្មភាពដាក់អន្ទាក់យកសត្វព្រៃទាំងតូចធំធ្វើអាជីវកម្ម។

ក្រុមមន្ត្រីសង្គមស៊ីវិលឃ្លាំមើលបញ្ហានេះស្ដីបន្ទោសទៅលើ មន្ត្រីស្ថាប័នជំនាញបរិស្ថានការពារដែនជម្រកសត្វព្រៃ និង អាជ្ញាធរពាក់ព័ន្ធថាមិនបានយកចិត្តទុកដាក់បង្ក្រាបករណីបំផ្លាញធនធានធម្មជាតិទាំងអស់ នេះ។

អតីតឆ្មាំអភិរក្សតំបន់ដែនជម្រកសត្វព្រៃលំផាត់ ខេត្តរតនគិរី នៅថ្ងៃពុធ ទី១៨ ខែធ្នូ អះអាងថា អន្ទាក់សត្វព្រៃដែលអាចចាប់បានសត្វគ្រប់ប្រភេទ (លើកលែងតែដំរី) រាប់រយអន្ទាក់ ត្រូវបានគេរកឃើញនៅក្នុងព្រៃដែនជម្រកសត្វដ៏សំខាន់នៃប្រទេសកម្ពុជាមួយនេះ ។ជាមួយនោះដែរព្រៃឈើមានតម្លៃក្នុងតំបន់អភិរក្សនេះ ក៏កំពុងត្រូវគេកាប់យកឈើជាបន្តបន្ទាប់។

ការអះអាងនេះ ធ្វើឡើងបន្ទាប់ពីក្រុមការងារអង្គការអភិរក្សមួយក្រុមបានចុះទៅ ធ្វើការស្រាវជ្រាវនៅតំបន់ដែនជម្រកសត្វព្រៃចាប់ពីថ្ងៃទី៦ ដល់ថ្ងៃទី១៩ ខែធ្នូ នឹងបានឃើញបទល្មើសទាំងពីរនេះ។

សាក្សីដែលបានឃើញហេតុការណ៍បំផ្លាញធនធានធម្មជាតិសុំមិនឲ្យ បញ្ចេញឈ្មោះសំដែងទុទិដ្ឋិនិយមថា ប្រសិនរាជរដ្ឋាភិបាលមិនចាត់វិធានការជាក់លាក់ក្នុងការបង្ក្រាប និងស៊ើបអង្កេតបន្ទាន់ ជុំវិញសកម្មភាពបំផ្លាញធនធានធម្មជាតិនេះទេ។ សត្វព្រៃនិងព្រៃឈើនៅតំបន់នោះ នឹងត្រូវវិនាសអស់នៅពេលខាងមុខនេះ។

សាក្សីដដែលបន្តថា កន្លងទៅនេះដើមឈើផលិតជ័រទឹករបស់ប្រជាពលរដ្ឋនៅក្នុងព្រៃការពារ រាប់ពាន់ដើម ត្រូវគេកាប់យកឈើ ហើយបច្ចុប្បន្នឈើមានតម្លៃនៅសេសសល់ក៏ត្រូវគេកាប់បន្តទៀត៖ «ដើរ ទៅហ្នឹងវាឃើញមែនហ្នឹងហើយ ប៉ុន្តែគេថត គេយករូបភាពទៅអស់ហើយ ប៉ុន្តែមិនដឹងគេដោះស្រាយដោយវិធីណា។ ជាង ១០០អន្ទាក់ដែលយកទៅភ្នំពេញ ចៀសតែដំរីទេអត់ជាប់ បើថាខ្ទីង ទន្សោង ជ្រូក ឲ្យតែជាន់ជាប់ហើយ។ ប៉ុន្តែខ្ញុំទៅហ្នឹងជួបពីរកន្លែង អារឈើៗ គេអត់ទាន់ដឹក។គេអារឈើគេអត់ចាប់ទេ តែគេថត»។

កាលពីមីនា កន្លងទៅ អ្នកយកព័ត៌មានវិទ្យុអាស៊ីសេរី និងមន្ត្រីសមាគមអាដហុក បានចូលទៅកាន់តំបន់ដែនជម្រកសត្វព្រៃសង្កេតឃើញនៅចំណុចអូរតានវ៉ាន និងគុម្ពោតព្រៃធំមានឈើមូលមានមុខកាត់ធំៗរាប់រយដើម ត្រូវគេអាររំលំបន្សល់ចោលក្នុងព្រៃ និងឈើមូលរាប់រយដើមទៀត ត្រូវគេដឹកជញ្ជូនចេញបន្សល់តែគល់នៅក្នុងព្រៃនោះ។

ប្រជាពលរដ្ឋជាម្ចាស់ដើមច្បោះក្នុងដែនជម្រកសត្វព្រៃប៉ាន់ ប្រមាណថា ឈើមូលរាប់ពាន់ដើមត្រូវគេអារដឹកជញ្ជូនចេញពីព្រៃដែនជម្រកសត្វ ព្រៃនេះ ចាប់ពីពាក់កណ្ដាលឆ្នាំ២០១២ មក។ វិទ្យុអាស៊ីសេរីនៅថ្ងៃទី១៨ខែធ្នូមិនអាចទាក់ទងប្រធានផ្នែកដែនជម្រកសត្វព្រៃលំផាត់លោក សន សុវណ្ណសុង សុំបញ្ជាក់ពីសេចក្ដីអះអាងនេះបានទេ។

មន្ត្រីឃ្លាំមើលបញ្ហាព្រៃឈើសមាគមអាដហុក ខេត្តរតនគិរី លោក ឆាយ ធី កត់សម្គាល់ថា លោកបានចុះអង្កេតនៅតំបន់នោះ ៣លើកហើយ សង្កេតឃើញឈើមូលមានតម្លៃក្នុងព្រៃដែនជម្រកនៅតែមានគេកាប់ជា បន្តបន្ទាប់។ លោកអះអាងថា សត្វព្រៃក៏ជាផ្នែកមួយសំខាន់ដែលត្រូវបានគេ ដាក់អន្ទាក់ ឬបរបាញ់ដោយកាំភ្លើងដើម្បីយកសាច់ និងវត្ថុមានតម្លៃរបស់សត្វព្រៃទៅលក់នៅទីផ្សារ។

លោកអំពាវនាវសុំឲ្យមន្ត្រីថ្នាក់ជាតិប្រញាប់ស៊ើបអង្កេតករណីនេះ៖ «មិន មែនត្រឹមឈើព្រៃល្អប្រណិតទេ ថែមទាំងសត្វព្រៃដែលជាជម្រកចុងក្រោយបំផុតហើយនៅប្រទេសកម្ពុជា ត្រូវបានរងហិនហោចមហន្តរាយជាលើកចុងក្រោយនេះ ព្រោះកន្លងមកយើងអន្តរាគមន៍ទៅថ្នាក់ខេត្តហើយ»។

យ៉ាងនេះក្តីប្រជាពលរដ្ឋសហគមន៍រស់នៅតំបន់ជាប់ព្រៃដែនជម្រកសត្វព្រៃលំផាត់ធ្លាប់បានអះអាងថា ក្រុមហ៊ុនសម្បទានសេដ្ឋកិច្ចដូចជាក្រុមហ៊ុន ហ័ញ អាញ់ លំផាត់ និងក្រុមឈ្មួញមានអំណាច រួមទាំងកងប្រដាប់អាវុធមួយចំនួន គឺជាអ្នកពាក់ព័ន្ធកាប់ឈើក្នុងព្រៃដែនជម្រក។ ចំណែកមន្ត្រីអភិរក្សដែនជម្រក ក៏បានរួមចំណែកឃុបឃិតទាក់ទិនបទល្មើសព្រៃឈើនិងសត្វព្រៃនេះដូច គ្នា៕

ប្រភព អាស៊ីសេរី

អានបន្ត

ឆេះផ្ទះមន្រ្តី រដ្ឋបាលព្រៃឈើ និងអាជីវករ នៅស្រុកថ្មគោល ខូចខាតគិត ជាទឹកប្រាក់ ជាង៣ម៉ឺនដុល្លារ

12/20/2013 09:48:00 AM

Unknown

បាត់ដំបង៖ ផ្ទះមន្រ្តីរដ្ឋបាលព្រៃឈើ និងផ្ទះអាជីវករ ស្ថិតនៅក្រុមទី៤ ភូមិថ្មគោលជើង ឃុំតាម៉ឺន ស្រុកថ្មគោល ខេត្តបាត់ដំបង ត្រូវបានភ្លើងឆេះកាលពីវេលាម៉ោងប្រមាណ៤៖៣០នាទីទាបភ្លឺ ថ្ងៃទី២០ ខែធ្នូ ឆ្នាំ២០១៣ បណ្តាលឲ្យ ខូចខាតសរុបគិតជា ទឹកប្រាក់ ជាង៣ម៉ឺនដុល្លារ។

សេចក្តីរាយការណ៍ពីសមត្ថកិច្ចស្រុកថ្មគោល បានឲ្យដឹងថា មូលហេតុដែល នាំអគ្គិភ័យខាងលើនេះ បណ្តាលមកពីទុស្សខ្សែភ្លើង ។ សមត្ថកិច្ចបានបន្តទៀតថាក្នុងគ្រោះអគ្គិភ័យនេះរថយន្តរបស់ ស្រុកថ្មគោលចំនួន៨គ្រឿងបានចេញជួយអន្តរាគមន៍ហើយភ្លើងបានរលត់ទៅវិញនៅវេលាម៉ោង ប្រមាណ ៥៖៥០នាទី ព្រឹកថ្ងៃដដែលនេះ ។

ជនរងគ្រោះត្រូវបានសមត្ថកិច្ចប្រាប់ថាមានឈ្មោះ ទី១ ផៃ សុផល ភេទប្រុស អាយុ៤៦ឆ្នាំ ជាមន្រ្តីរដ្ឋបាលព្រៃឈើផ្ទះលក់ចានឆ្នាំងទីង្វៀនវាន់យុងភេទប្រុស អាយុ៥៣ ឆ្នាំ លក់ដូរនៅ ផ្សារថ្មគោល៕

ប្រភព ដើមអំពិល

អានបន្ត

Tuesday, December 17, 2013

ព្រះមហាក្សត្រ តែងតាំងនាយនគរបាលជាតិ ចំនួន ២៤រូប ធ្វើជាទីប្រឹក្សាក្រសួងមហាផ្ទៃ

12/17/2013 08:57:00 PM

Unknown

ប្រភពព័ត៌មាន បានឱ្យដឹងកាលពីរសៀល ថ្ងៃម្សិលមិញនេះថា ព្រះករុណា ព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រនៃ ព្រះរាជាណាចក្រកម្ពុជាបានចេញ ព្រះរាជក្រិតកាលពីថ្ងៃទី០៩ ខែធ្ន ឆ្នាំ២០១៣ បានត្រាស់បង្គាប់តែងតាំង នាយនគរបាលជាតិ ឋានន្តរស័ក្កចាប់ផ្កាយ១ ដល់ផ្កាយ៣ ដែលកំពុងបំរើការងារនៅតាមបណ្តាអង្គភាពនាយក ដ្ឋានចំនួន២៤រូប ធ្វើជាទីប្រឹក្សាក្រសួង មហាផ្ទៃ ដែលមានឋាន:ស្មើរ រដ្ឋលេខាធិការ, អនុរដ្ឋលេខធិកា និងអគ្គនាយក ក្នុងចំណោមនោះ ដូចមានរាយនាមខាងក្រោម ៖

១- ឯកឧត្តម គន្ធ សំអឿន ឋាន:ស្មើរដ្ឋលេខាធិការ

២- លោក គ្រី ទូច មានឋានៈស្មើរដ្ឋលេខាធិការ

៣- លោក គឹម សាម៉ន មានឋានៈស្មើអនុរដ្ឋលេខាធិការ

៤- លោក អៀក ខែម មានឋានៈស្មើអនុរដ្ឋលេខាធិការ

៥- លោក ព្រហ្ម ជាន មានឋានៈស្មើអនុរដ្ឋលេខាធិការ

៦- លោក នូ នឿន មានឋានៈស្មើអនុរដ្ឋលេខាធិការ

៧-លោក លន់ ណេត មានឋានៈស្មើអនុរដ្ឋលេខាធិការ

៨- លោក ថន អ៊ឹម មានឋានៈស្មើអនុរដ្ឋលេខាធិការ

៩- លោក សុខ សារ៉េត មានឋានៈស្មើអនុរដ្ឋលេខាធិការ

១០- លោក ហ៊ូ សេងលន់ មានឋានៈស្មើអនុរដ្ឋលេខាធិការ

១១- លោក វ៉ាន់ ណយ មានឋានៈស្មើអនុរដ្ឋលេខាធិការ

១២- លោក ធម្ម ទង មានឋានៈស្មើអនុរដ្ឋលេខាធិការ

១៣- លោក អុន ឈន មានឋានៈស្មើអនុរដ្ឋលេខាធិការ

១៤- លោក ឯក ក្រឹត្យ មានឋានៈស្មើអនុរដ្ឋលេខាធិការ

១៥- លោកឧត្តមសេនីយ៍ឯក ម៉ែន សុផុន មានឋានៈស្មើអនុរដ្ឋលេខាធិការ

១៦- លោកឧត្តមសេនីយ៍ឯក ជុំសូយ៉ាត មានឋានៈស្មើអនុរដ្ឋលេខាធិការ

១៧- លោកឧត្តមសេនីយ៍ទោ វ៉ាន់ រដ្ឋា មានឋានៈស្មើអនុរដ្ឋលេខាធិការ

១៨- លោកឧត្តមសេនីយ៍ទោ ផូ ខន មានឋានៈស្មើនុរដ្ឋលេខាធិការ

១៩- លោកឧត្តមសេនីយ៍ទោ ហ៊ឹម ផុន មានឋានៈស្មើអនុរដ្ឋលេខាធិការ

២០- ឯកឧត្តមឧត្តមសេនីយ៍ទោ រស់ នឹមសារុន មានឋានៈស្មើអនុរដ្ឋលេខាធិការ

២១- លោកឧត្តមសេនីយ៍ទោ ប៉ាន់ ឡាច មានឋានៈស្មើអនុរដ្ឋលេខាធិការ

២២- លោកឧត្តមសេនីយ៍ត្រី ឌិន វ៉ាន់ដេន មានឋានៈស្មើអនុរដ្ឋលេខាធិការ

២៣- លោក រ័ត្ន វ៉ែន មានឋានៈស្មើអគ្គនាយក

២៤- លោកឧត្តមសេនីយ៍ទោ គង់ ចន្ធី មានឋានៈស្មើអគ្គនាយក៕

ប្រភព សារព័ត៏មានសេរី

អានបន្ត

សម្តេចក្រុមព្រះ នរោត្តម រណឬទ្ធិ ចេញសេចក្តីថ្លៃងការណ៍

12/17/2013 05:55:00 PM

Unknown

ភ្នំពេញៈ សម្តេចក្រុមព្រះ នរោត្តមរណឬទ្ធិ ប្រធានឧត្តមប្រឹក្សាផ្ចាល់ ព្រះមហាក្សត្រ បានចេញសេចក្តីថ្លែងការណ៏ សម្តែងព្រះរាជហឫទ័យ ក្តុកក្តួល ចំពោះការបាត់ព្រះបរមសារី រិកធាតុ និងវត្ថុមានតម្លៃ នៅក្នុងសក្យមុនីចេតីយ លើភ្នំព្រះរាជទ្រព្យ កាលពីរំលងអាធ្រាត្រឈានចូល ថ្ងៃទី១០ ខែធ្នូ ឆ្នាំ២០១៣កន្លងទៅ។ សេចក្តីថ្លែងការណ៏ របស់សម្តេចក្រុមព្រះ មានដូចខាងក្រោម៖