3/11/2014 11:26:00 AM
Sam
កម្មករកំពុងធ្វើការនៅក្នុងរោងចក្រកែច្នៃអង្កររបស់ក្រុមហ៊ុនខ្មែរហ៊្វូតនាពេលកន្លងមក។ រូបថត ហេង ជីវ័ន
ភ្នំពេញៈ ក្រសួងពាណិជ្ជកម្មកម្ពុជានឹងជួបប្រជុំជាមួយក្រុមពាណិជ្ជករ ស្រូវ-អង្ករនៅថ្ងៃពុធសប្តាហ៍នេះដើម្បីពិភាក្សាពីការ បង្កើតសហព័ន្ធស្រូវ-អង្ករកម្ពុជា ដែលជាស្ថាប័នថ្នាក់ជាតិសម្រាប់ជាដៃគូរបស់រដ្ឋាភិបាលក្នុងការអភិវឌ្ឍឧស្សាហកម្មនេះ។
ការ រៀបចំបង្កើតសហព័ន្ធនេះ ធ្វើឡើងបន្ទាប់ពីមានការឯកភាពពី លោកនាយករដ្ឋមន្រ្តី ហ៊ុន សែន ដែលកាលពីថ្ងៃអង្គារសប្តាហ៍មុនបានសម្រេចអនុញ្ញាតឲ្យមានការ បង្កើតសហព័ន្ធស្រូវ-អង្ករដើម្បីឲ្យមានភាពងាយស្រួល ក្នុងការសហការជាមួយសហព័ន្ធស្រូវអង្ករពីបណ្តាប្រទេសក្នុងតំបន់អាស៊ាន និងដើម្បីត្រៀមខ្លួនក្នុងការចូលរួមប្រកួតប្រជែងនៅក្នុង សហគមន៍សេដ្ឋកិច្ចអាស៊ានឆ្នាំ ២០១៥។
តំណាងពាណិជ្ជករស្រូវ-អង្ករនៅកម្ពុជាដែលបច្ចុប្បន្ននៅមានក្រុមដោយឡែកៗពីគ្នាបាន លើកឡើងថា ការរៀបចំសហព័ន្ធរួមគ្នាថ្នាក់ជាតិមួយគឺជា ការចាំបាច់ដើម្បីធ្វើឲ្យការសហការក្នុងចំណោមពាណិជ្ជករ មានភាពរឹងមាំ ខណៈបេសកកម្មកន្លងមកធ្វើឡើងដាច់ដោយឡែកពីគ្នា។
លោក ដេវីដ វ៉ាន់វិចិត្រ អគ្គលេខាធិការរង សម្ព័ន្ធអ្នកផលិតស្រូវ និងនាំចេញអង្ករកម្ពុជា បានឲ្យដឹងថា ការបង្កើតសហព័ន្ធថ្នាក់ជាតិគឺជាជំហាននៃការវិវត្តមួយ ដើម្បីបង្កើតបរិយាកាសឲ្យក្រុមពាណិជ្ជករទាំងអស់ធ្វើការ ចុះសម្រុងគ្នាឲ្យបានល្អជាងមុនដើម្បីផលប្រយោជន៍រួម។
លោកថ្លែងថា៖ «យើងគាំទ្រវិធានការណាមួយដើម្បីឲ្យមានការ បង្រួបបង្រួមគ្នាក្នុងវិស័យស្រូវ-អង្ករ។ កាលណាមានសហព័ន្ធបង្កើតថ្មី ពួកយើងទាំងអស់នឹងស្ថិតក្រោមឆត្រតែមួយរបស់សហព័ន្ធ»។
ប្រទេសកម្ពុជាដែលបាននាំចេញអង្ករទៅក្រៅប្រទេសបានជិត៤០ម៉ឺនតោន កាលពីឆ្នាំមុនមានសមាគមស្រូវ-អង្ករយ៉ាងហោចណាស់បីធំៗ។ សមាគមនាំចេញអង្ករកម្ពុជាដែលមានលោក លឹម ប៊ុនហេង ជាប្រធាន សម្ព័ន្ធអ្នកផលិតស្រូវ និងនាំចេញអង្ករកម្ពុជា របស់លោក ដេវីដ វ៉ាន់វិចិត្រ និងសហព័ន្ធអ្នកនាំចេញអង្ករកម្ពុជាដែលមានលោក គឹម សាវុធ ជាប្រធាន។
ការ មានសមាគមបែកខ្ញែកគ្នានាពេលកន្លងមកហាក់ធ្វើឲ្យពាណិជ្ជករ ក្រុមនីមួយៗមិនសហការគ្នាបានល្អ។ ពេលដែលអង្ករកម្ពុជាត្រូវបានជ្រើសរើសជាអង្ករមានគុណភាពល្អ ជាងគេរបស់ពិភពលោកជាលើកទីពីរកាលពីឆ្នាំមុនក្រុមហ៊ុននាំចេញ អង្ករមួយចំនួនអះអាងតាមរយៈសារព័ត៌មានក្នុងស្រុកជាច្រើន ថា សមិទ្ធផលនោះជារបស់ក្រុមហ៊ុនខ្លួន។ ការប្រកាសរបស់ក្រុមហ៊ុនទាំងនោះគឺជាការប្រាស់ចាកពីការព្រមព្រៀងមុនពេលចេញដំណើរទៅប្រកួត ខណៈកាលនោះតំណាងសមាគម សហព័ន្ធ និងក្រុមហ៊ុនសុទ្ធតែយល់ព្រមថា ពួកគេតំណាងដល់អង្ករកម្ពុជា ហើយរាល់ជោគជ័យទាំងឡាយជាកេរ្តិ៍ឈ្មោះ និងការសម្រេចបានរបស់កម្ពុជា។
លោក គឹម សាវុធ ប្រធានសម្ព័ន្ធអ្នកនាំចេញអង្ករកម្ពុជាបានឲ្យដឹងថា សម្ព័ន្ធស្រូវ-អង្ករកម្ពុជា ដែលនឹងបង្កើតឡើងនាពេលឆាប់ៗនឹងធ្វើឲ្យពាណិជ្ជករស្រូវ-អង្ករទាំងអស់មានកិច្ចសហការគ្នាបានល្អ។
លោកបន្តថា៖ «ខ្ញុំគិតថា សហព័ន្ធនេះនឹងធ្វើការមានប្រសិទ្ធភាពល្អ ហើយជួយពង្រឹងភាពប្រកួតប្រជែងរបស់អង្ករកម្ពុជាកាន់តែខ្លាំង »។
លោក លឹម ប៊ុនហេង ប្រធានសមាគមនាំចេញអង្ករកម្ពុជាលើកឡើងស្រដៀងគ្នានេះដែរ។ លោកថ្លែងថា៖ «យើងរីករាយក្នុងការរួមគ្នាជាបាច់ធំមួយដើម្បីឲ្យកម្លាំង របស់យើងខ្លាំងនៅលើឆាកអន្តរជាតិ»៕
ប្រភពៈ ភ្នំពេញប៉ុសិ៍្ត
ចំណាត់ក្រុមៈ 
0 comments:
Post a Comment