នៅ​ក្នុង​ឆ្នាំ​ ២០១៣​ នេះ ​មាន​ហេតុការណ៍​ជា​ច្រើន​កើត​ឡើង​ចំពោះ​សិល្បករ សិល្បការិនី​ខ្មែរ ដូច​ជា​ ការ​ជួប​គ្រោះ​ថ្នាក់​ចរាចរ រង​ការ​រិះគន់​ពី​ទស្សនិកជន ការ​​លែង​លះ​គ្នា និង​ការ​រៀប​អាពាហ៍ពិពាហ៍​ជា​​ដើម។ ក្នុង​នោះ​ផង​ដែរ​មាន​រឿង​មួយ​ចំនួន​បាន​កើត​ឡើង​ដោយ​នឹក​ស្មាន​មិន​ដល់​​ ចំពោះ​ពួកគេ។ តារា​ដែល​មាន​រឿង​ហេតុ​នឹក​ស្មាន​មិន​ដល់​នោះ​រួម​មាន៖
១, លោក ខេមរៈ សិរីមន្ត កាល​ពី​ថ្ងៃ​ទី៧ ខែ​មីនា ឆ្នាំ​២០១៣ បាន​ជួប​គ្រោះ​ថ្នាក់​ចរាចរ​ដ៏​រន្ធត់​នៅ​លើ​កំណាត់​ផ្លូវ​ជាតិ​លេខ៤ ដែល​បណ្ដា​ឱ្យ​​មនុស្ស​ស្លាប់ និង​របួស​​ក្នុង​នោះ​រួម​មាន កូន​ប្រុស​យាយ ណយ សំណាង និង​កូន​ប្រុស​របស់​នាយ កុយ ផង​ដែរ។ គ្រោះ​ថ្នាក់​ចរាចរ​​នឹក​ស្មាន​មិន​ដល់​កើត​ឡើង​ចំពោះ​តារា​រូប​នេះ​បណ្ដា​ ឱ្យ​រថយន្ត​ទំនើប​របស់​លោក Tundra ខូច​ខាត​ទាំង​ស្រុង។ ម្យ៉ាង​ទៀត​ធ្វើ​ឱ្យ​លោក​រអា​រឿង​ធ្វើ​ដំណើរ​លើ​ផ្លូវ​ជាតិ​លេខ៤ តទៅ​ទៀត៕
តារា​ចម្រៀង ខេមរៈ សិរីមន្ត
២, អ្នក​នាង គង់ សុជាតិ ពិធីការិនី​ រូប​នេះ​បាន​រៀប​អាពាហ៍ពិពាហ៍​នឹង​លោក ជា វិបុល ដែល​ទស្សនិកជន​មួយ​ចំនួន​ស្ទើរតែ​មិន​ជឿ។ មិន​ជឿ​នៅ​ត្រង់​ថា​​អ្នក​​នាង គង់ សុជាតិ និង​ លោក ជា វិបុល មាន​វ័យ​ខុស​គ្នា​ឆ្ងាយ។ អ្វី​​ដែល​ពិសេស​ធ្វើ​ឱ្យ​ទស្សនិកជន​នឹក​ស្មាន​មិន​ដល់​នោះ​​គឺ​ពិធីករ​ទាំង ​ពីរ​មិន​ដែល​ទទួល​ស្គាល់​ចំណង​ស្នេហ៍​នឹង​គ្នា​នោះ​ទេ ប៉ុន្តែ​ចុង​ក្រោយ​អ្នក​ទាំង​ពីរ​រៀប​អាពាហ៍ពិពាហ៍​ជា​មួយ​គ្នា​ធ្វើ​ ព្រងើយ៕
គង់ សុជាតិ និង ជា វិបុល ថ្ងៃ​រៀប​អាពាហ៍ពិពាហ៍
៣, អ្នក​នាង ចន ច័ន្ទ​លក្ខិណា នៅ​ទី​បំផុត​អាពាហ៍ពិពាហ៍​មាន​អាយុ​កាល​ជាង​១០​ឆ្នាំ រវាង​អ្នក​​នាង ចន ច័ន្ទ​លក្ខិណា និង​លោក យុត្ថារ៉ា ឆានី បាន​ដើរ​ដល់​ផ្លូវ​បំបែក បន្សល់​ទុក​កូន​ស្រី​មួយ​ជា​ចំណង​ដៃ ដោយ​គ្មាន​នរណា​ម្នាក់​នឹក​ស្មាន​ដល់​នោះ​ទេ។ បណ្ដាញ​សារព័ត៌មាន​ជា​ច្រើន​បាន​ចុះ​ផ្សាយ​ថា​ការ​​ចែក​ផ្លូវ​គ្នា​ដើរ​រវាង ​តារា​ទាំង​ពីរ​ដួង​នេះ​បណ្ដាល​មក​ពី​មាន​អ្នក​ទី​៣ ដែល​ជា​ឧត្ដម​សេនីយ៍​​មក​ជ្រែក​ស្នេហ៍ ក៏​ប៉ុន្តែ​អ្នក​នាង ចន ច័ន្ទ​លក្ខិណា បាន​បដិសេធន៍​ដោយ​លើក​ឡើង​ថា​បណ្ដាល​មក​ពី​ការ​រស់​នៅ​មិន​ចុះ​សម្រុង​នឹង​ គ្នា៕
យុត្ថារ៉ា ឆានី និង​ ចន ច័ន្ទលក្ខិណា កាល​នៅ​ផ្អែមល្ហែម
៤, លោក ព្រីង ច័ន្ទ​បុត្រ បាន​ជួប​ រឿង​ដែល​នឹក​ស្មាន​មិន​ដល់​ក្នុង​ជីវិត​របស់​លោក ដោយសារ​តែ​រៀប​អាពាហ៍ពិពាហ៍​ជា​មួយ​ អ្នក​នាង គឹង សុខា ប្អូន​ថ្លៃ​របស់​ឧត្ដម​សេនីយ៍​ គន់ គីម មិន​បាន​ប៉ុន្មាន​ផង​ក៏​លែងលះ​គ្នា​ទៅ​វិញ។ បញ្ហា​នេះ​លោក​បញ្ជាក់​ថា​ ដោយសារ​ការ​រស់​នៅ​មិន​ចុះ​សម្រុង​នឹង​គ្នា។ បន្ថែម​លើ​ការ​បាត់បង់​ស្នេហ៍​ដ៏​មិន​គួរ​ឱ្យ​ជឿ​នេះ ហាង Gold Snooker ក៏​បាន​ដួល​រលំ​ថែម​ទៀត។ នេះ​ដូច​សុភាសិត​មួយ​ពោល​ថា “ប្រាក់​ក៏​បង់ ថង់​ក៏​ដាច”៕
ព្រីង ច័ន្ទបុត្រ ថ្ងៃ​រៀប​អាពាហ៍ពិពាហ៍
៥, កញ្ញា ឆ័យលី ដាឡែន ដោយសារ​តែ​ការ​បង្ហាញ​ភាព sexy ជ្រុល​ពេក​​ កាល​ពី​ឆ្នាំ ​២០១២ ​កន្លង​ទៅ​ អំឡុង​ពេល​កញ្ញា​ទៅ​សម្ដែង​នៅ​អាមេរិក​ធ្វើ​ឱ្យ​ក្រសួង​​ព្រមាន ហើយ​បណ្ដាញ​ស្ថានីយ​ទូរទស្សន៍​ក្នុង​ស្រុក​មិន​ហ៊ាន​អញ្ជើញ​កញ្ញា​ឱ្យ​ឡើង​ ច្រៀង​នៅ​តាម​ប៉ុស្តិ៍​របស់​ពួកគេ​ទេ។ កេរ្តិ៍ឈ្មោះ​របស់​តារា sexy រូប​នេះ​ស្ទើរតែ​បាត់បង់​ទៅ​ហើយ​នៅ​ពេល​នោះ ក៏ប៉ុន្តែ​មក​ដល់​ឆ្នាំ​ ២០១៣ ​ប្រជាប្រិយភាព​របស់​នាង​បាន​ងើប​​វិញ​មិន​គួរ​ឱ្យ​ជឿ។​ ក្នុង​នោះ​បណ្ដា​ស្ថានីយ​ទូរទស្សន៍​ក្នុង​ស្រុក ក៏​ដូច​ជា​ក្រុមហ៊ុន​ផ្សព្វផ្សាយ​ពាណិជ្ជកម្ម​នានា​​បាន​អញ្ជើញ​កញ្ញា​ឱ្យ​​ ច្រៀង​ឡើង​វិញ៕
ឆ័យលី ដាឡែន ថ្ងៃ​សម្ពោធ​ហាង អេឡិច ច័ន្ទត្រា
៦, លោក សួន ពិសិដ្ឋ បាន​ឈ្នះ​ពាន​​ជា​អ្នក​និពន្ធ​ឆ្នើម​​ពី​កម្មវិធី​អាណាចក្រ​តារា​ពីរ​ឆ្នាំ​ ជាប់​គ្នា​ ស្ទើរតែ​មិន​គួរ​ឱ្យ​ជឿ ខណៈ​ដែល​ផលិតកម្ម​​របស់​លោក​ធ្លាប់​និពន្ធ​បាន​ដួល​រលំ។ ម្យ៉ាង​ទៀត​បទ​ភ្លេង​ ដែល​លោក​បាន​និពន្ធ​ក្នុង​រយៈ​ពេល​ចុង​ក្រោយ​នេះ​ហាក់​មិន​សូវ​ទទួល​បាន​ ជោគជ័យ​ខ្លាំង​ដូច​កាល​ពី​ពេល​មុន៕
សួន ពិសិដ្ឋ ថ្ងៃ​ទទួល​ពាន​អាណាចក្រ​តារា
៧, អ្នក​នាង ស្វែង​ សុជាតា រឿង​មិន​គួរ​ឱ្យ​ជឿ និង​នឹក​ស្មាន​មិន​ដល់​ សុខៗ​តារា​ដែល​ឈ្នះ​ពាន​ពីរ​ឆ្នាំ​ជាប់​គ្នា ​ពី​កម្មវិធី​អាណាចក្រ​តារា កោសក់​​ដ៏​ស្រស់​ស្អាត​របស់​នាង​ចោល។ ការ​កោ​សក់​នេះ​ត្រូវ​បាន​អ្នក​នាង​បញ្ជាក់​ថា​ ការ​កោ​សក់​នេះ​ដើម្បី​សម្ដែង​ការ​គោរព​ចំពោះ​ព្រះបរមសព​ ព្រះ​បរម​រតន​កោដ្ឋ ដោយ​សារ​តែ​ក្នុង​ព្រះ​រាជពិធី​ថ្វាយ​ព្រះ​ភ្លើង​ព្រះ​បរម​សព​កាល​ពី​កន្លង​ ទៅ អ្នក​នាង មិន​មាន​វត្តមាន​ចូល​រួម ព្រោះ​តែ​រវល់​ការងារ​នៅ​ប្រទេស មីយ៉ាន់ម៉ា។
ទោះ​ជា​យ៉ាង​ណា​ក៏​ដោយ​​បណ្ដាញ​សារព័ត៌មាន​ក្នុង​ស្រុក ក៏​ដូច​ជា​ប្រភព​មួយ​ចំនួន​អះអាង​ថា​ការ​កោ​សក់​របស់​អ្នក​នាង ស្វែង សុជាតា ព្រោះ​ជួប​រឿង​ជូរ​ចត់​ល្មម​ឲ្យ​នាង​កោរ​សក់​ស្មា​លា​ ជាមួយ​មន្ត្រី​ប៉ូលីស ក្រសួង​មហា​ផ្ទៃ លោក គង់ សុផារ៉ា ដែល​ដំបូង​ឡើយ​ល្អូក​ល្អិន​ចាក់​ទឹក​មិន​លិច ផ្អែម​ល្ហែម​ដូច​ទឹក​ឃ្មុំ​ខែ​ចែត្រ ប៉ុន្តែ​ចុង​ក្រោយ​ត្រូវ​បែក​ខ្ញែក ហែក​ផ្លូវ​ចែក​គ្នា​ដើរ​ស្ទើរ​មិន​ជឿ និង​វិះ​តែ​ហ្នឹង​ឡើង​តុលាការ​ប្ដឹង​ផ្ដល់​គ្នា​ទៀត​ផង៕
ស្វែង សុជាតា កោ​សក់​ រូបថត៖ Facebook Sveng Socheata
៨, ​កញ្ញា ឈិន សុខរ៉ាវី តារា ​ចម្រៀង​ ដែល​គេ​ទទួល​ស្គាល់​ថា មាន​ចរិត​សុភាព​រាបសារ គួរ​ឲ្យ​ស្រឡាញ់ បាន​ចងក​សម្លាប់​ខ្លួន​​​នៅ​ផ្ទះ​របស់​នាង​ នៅ​សង្កាត់​ក្រាងធ្នុង ខណ្ឌពោធិ៍​សែន​ជ័យ រាជធានី​ភ្នំពេញ កាល​ពី​ព្រលប់​ថ្ងៃ​ទី ១៤ ខែ ​វិច្ឆិកា កន្លង​ទៅ ។ នៅ​មុន​នាង​ស្លាប់​ ឈិន សុខរ៉ាវី បាន​បង្ហោះ​រូប​មិត្ត​ជិត​ស្និទ្ធ​​មួយ​ចំនួន និង​នាង​​បាន​សរសេរ​សារ​ជាពាក្យ​ស្លោក​ថា “មនុស្ស​ស្លាប់​តែ​រូប​កាយ​ទេ តែ​ឈ្មោះ​នៅ​រស់​ជារៀង​រហូត។ មនុស្ស​អាក្រក់​រស់​តែ​រូបកាយ​ទេ តែឈ្មោះ​បាន​ស្លាប់​បាត់​​ទៅហើយ”។
រូបខាងឆ្វេង ឈិន សុខរ៉ាវី និង​មិត្តភ័ក្ដិ​ជិត​ស្និទ្ធ ដែល​នាង​បានបង្ហោះ​រូប​នេះ ​នៅ​​លើWall ​Facebook របស់​នាង​ នៅ​មុន​នាង​ស្លាប់​
អត្ថបទ៖ អ៊ីង សុឡា
ប្រភពៈ Sabay