បាតុកម្ម​រីក​ធំ​បន្ទាប់​ពី ហ៊ុន សែន និង​គ.ជ.ប បដិសេធ​ការ​បោះ​ឆ្នោត​ឡើង​វិញ

គណៈកម្មាធិការជាតិរៀបចំការបោះឆ្នោត នៃប្រទេសកម្ពុជា បានប្រកាសជាផ្លូវការនៅចុង សប្ដាហ៍​នេះ​ ថាគណៈ​កម្មាធិការនេះ នឹង«មិន»រៀបចំការបោះឆ្នោត តាមការទាមទាររបស់គណបក្ស​សង្គ្រោះ​ជាតិ​​​នោះទេ ខណៈរលក​បាតុកម្មរៀបចំឡើងដោយគណបក្សប្រឆាំងមួយនេះ បានកើតឡើង​យ៉ាង​ខ្លាំង​​ក្លា។ ការបដិសេធរបស់ គ.ជ.ប. និង​លោក ហ៊ុន សែន បន្តបន្ទាប់គ្នានេះបានបង្ក​ឲ្យ​មានការ​អំពាវ​​​​នាវទ្វេដងឲ្យមានបាតុកម្មជាទូទៅនិងទំហំធំមួយ​នៅ​ទូទាំង​ប្រទេសប្រឆាំង​នឹង​រដ្ឋា​ភិបាល​សព្វ​ថ្ងៃ​ដែលចេញមកពីរដ្ឋសភា«ឯកបក្ស» នៃគណបក្សប្រជាជនកម្ពុជា។

 

នយោបាយកម្ពុជា -កាលពីថ្ងៃសៅរ៍ទី២១ខែធ្នូឆ្នាំ២០១៣នេះអ្នកនាំពាក្យនិងជាអគ្គលេខាធិការនៃ​គណៈ​​កម្មា​ធិការ​ជាតិរៀបចំការបោះឆ្នោត (គ.ជ.ប) លោក ទេព នីថា បានថ្លែងថា ច្បាប់បោះឆ្នោត និង​រដ្ឋ​ធម្ម​​នុញ្ញនៃប្រទេស​កម្ពុជា បានបញ្ជាក់តែពីនិតិវិធីនៃការបោះឆ្នោតជ្រើសតាំងតំណាងរាស្ត្រ តែមិន​បាន​​​ថ្លែងពីការរៀបចំឡើងវិញ នៃ​ការបោះឆ្នោតនោះទេ។ ការរៀបចំការបោះឆ្នោតឡើងវិញអាច​ប្រ​ព្រឹត្តិទៅបាន នៅក្នុងលក្ខខ័ណ្ឌតែមួយគត់ នោះគឺ «បន្ទាប់ពីសភាតំណាងរាស្ត្រត្រូវបានរំលាយ ដែលប្រវត្តិ​សាស្ត្រ​​​​របស់ប្រទេសកម្ពុជា មិនទាន់ធ្លាប់ជួបប្រទះបញ្ហា​នេះនៅឡើយ»។

លោកទេព នីថា បានបញ្ជាក់ទៀតថា «ដូច្នេះ គ្មានការបោះឆ្នោតសារឡើងវិញ តាមការទាមទាររបស់គណបក្ស​សង្គ្រោះជាតិ» នោះទេ។សេចក្ដីប្រកាសជាផ្លូវការរបស់ គ.ជ.ប. បានធ្វើឡើង​នៅក្រោយ​តែបន្តិចតែ​ប៉ុណ្ណោះ សេចក្ដីថ្លែងរបស់បុរសខ្លាំង​នៃ​ប្រទេសកម្ពុជា លោក ហ៊ុន សែន ដែលបានកាន់អំណាច និង​​នៅអង្គុយលើកៅអីជានាយករដ្ឋមន្ត្រី តាំងពីជិត​៣០ឆ្នាំ​មកហើយ។ កាលពីព្រឹកថ្ងៃសុក្រ ទី២០ ខែធ្នូ កន្លងមកនេះ លោក ហ៊ុន សែន បានថ្លែងទៅកាន់អ្នកសារព័ត៌មាននៅមន្ទីររដ្ឋសភាជាតិថា ប្រ​ទេស​​កម្ពុជា មិនមានច្បាប់សម្រាប់រៀបចំ ការបោះឆ្នោតឡើងវិញនោះទេ។ ក្នុងឱកាស​នោះដែរ លោកនាយករដ្ឋមន្ត្រីដែលជ្រើសតាំងដោយរដ្ឋសភា​ឯកបក្សចេញពីគណបក្សប្រជាជនបាន​ថ្លែង​​ថា លោកនឹងមិនចុះ​ចេញពីតំណែង តាមការទាមទាររបស់ក្រុមបាតុករ និងគណបក្សប្រឆាំងឡើយ។ លោកបាន​ចោទ​ជាសំនួរថា «តើខ្ញុំបានធ្វើកំហុសអ្វី?»។

ទំនងជាបានប្រតិកម្មតបវិញ ទៅនឹងអ្វីដែលលោក ហ៊ុន សែន និងគ.ជ.ប. លើកឡើងខាងលើនៅ​ថ្ងៃ​អាទិត្យ​ទី២២​ខែធ្នូនេះ រលកបាតុកម្មនៅរាជធានីភ្នំពេញ បានកើនឡើងកាន់តែខ្លាំង ដើម្បីទាម​ទារឲ្យ​ខាង​​តែបាន នូវការបោះឆ្នោត​ឡើងវិញនិងតម្រូវឲ្យលោក ហ៊ុន សែន ចុះចេញ​ពីតំណែង​ជានា​យក​រដ្ឋ​មន្ត្រី។ ក្រុមអ្នករៀបចំបាតុកម្ម ដែលភាគ​ច្រើនស្និតនឹងគណបក្សសង្គ្រោះជាតិបានថ្លែងថា​មនុស្ស​​ម្នាមិនតិចជាង៥សែននាក់បានប្រមូលគ្នាមក​ជួបជុំនៅទី​លានប្រជាធិបតេយ្យ និងចុះដើរតាម​ដង​ផ្លូវ​​នា​នាប្រឆាំងនឹងរដ្ឋាភិបាល។ ក្រុមអ្នកស្និតនឹងរដ្ឋាភិបាល គណបក្ស​ប្រជាជនកម្ពុជា ក៏បាន​ទទួលស្គាល់មានអ្នកចូលរួមច្រើនដែរ តែថាពួកគេបានបញ្ជាក់មានចំនួនច្រើនដោយសារតែ​មាន​ការ​​​​រាប់បញ្ចូលទាំងបណ្ដាជន ដែល​នៅជាប់គាំងចរាចរណ៍ នៅតាមដងផ្លូវនោះផង។

ប៉ុន្តែការលើកឡើងពីចំនួនអ្នកចូលរួមខាងលើត្រូវបានក្រុមអ្នកឃ្លាំមើលឯករាជ្យថ្លែងបញ្ជាក់ថា ជាទូ​ទៅ​​​​រាជធានី​ភ្នំពេញកម្រ នឹងមានការកកស្ទះចរាចរណ៍នៅពេលចុងសប្ដាហ៍នោះណាស់ហើយ​​ក៏​រិត​តែ​គ្មានការកកស្ទះនេះទៅ​ទៀតប្រសិន​បើបណ្ដាជនដឹងថាមានរលកបាតុកម្មនៅតាមដងផ្លូវ។ ប៉ុន្តែ​​​​ថាការលើកឡើងពីចំនួនរហូតដល់ ៥សែន​នាក់ វាដូចជាច្រើនពេក ខណៈទីលានប្រជាធិបតេយ្យ​អាច​​​ទទួលបានមនុស្ស រវាងតែពី១ម៉ឺននាក់ ទៅ៣ម៉ឺននាក់​ប៉ុណ្ណោះ៕

ប្រភព មនោរម្យ​