12/16/2013 02:55:00 PM
Unknown
ប្រជាពលរដ្ឋមួយចំនួនរស់នៅស្រុកបាភ្នំ ខេត្តព្រៃវែង
កំពុងលង់ខ្លួនចាញ់បោកកលល្បិចរបស់ក្រុមហ៊ុនបណ្ដាញ
អែហ្វ.អ៊ិច.អាយ.ស៊ី (Fxic)
ជាក្រុមរកស៊ីលើផ្នែកបណ្ដាក់លុយដោយទទួលបានការប្រាក់ខ្ពស់។
ក្នុងនោះមានប្រជាពលរដ្ឋខ្លះបានលង់ខ្លួនដោយសារការបញ្ចុះបញ្ចូល
របស់បុគ្គលិកក្រុមហ៊ុនមួយនេះ
ហើយបានយកប្រាក់របស់ខ្លួនទៅដាក់យកការប្រាក់ចាញ់បោកក្រុមហ៊ុន
អស់រាប់ម៉ឺនដុល្លារ។
ប្រជាពលរដ្ឋក្នុងនោះ រួមទាំងព្រះសង្ឃផង នៅខេត្តព្រៃវែង
បានចាញ់បោកការបញ្ចុះបញ្ចូលរបស់សមាជិកក្រុមហ៊ុនបណ្ដាញនេះ
ដោយបានយកប្រាក់របស់ខ្លួនទៅដាក់ដើម្បីជាប្រយោជន៍ទទួលបានការ
ប្រាក់ខ្ពស់ពីក្រុមហ៊ុនមួយនេះ។ ប៉ុន្តែផ្ទុយទៅវិញ
ការដាក់ប្រាក់របស់ប្រជាពលរដ្ឋ និងព្រះសង្ឃ
បែរជាខាតបង់ទាំងដើមទាំងចុង
ដោយពុំទទួលបានតាមអ្វីដែលក្រុមហ៊ុនបានមកណែនាំប្រជាពលរដ្ឋ
នោះឡើយ។
ប្រជាពលរដ្ឋម្នាក់ក្នុងចំណោមប្រជាពលរដ្ឋដែលបានចាញ់បោក
ក្រុមហ៊ុននេះ គឺលោក ពេញ លេញ រស់នៅភូមិព្រៃចម្ការ ឃុំស្ពឺខ
នៃស្រុកបាភ្នំ ឲ្យដឹងថា
សមាជិកបណ្ដាញរបស់ក្រុមហ៊ុនរកស៊ីឲ្យប្រជាពលរដ្ឋដាក់ប្រាក់បានការ
ខ្ពស់មួយនេះ
បានធ្វើសកម្មភាពដើរឃោសនាបញ្ចុះបញ្ចូលប្រជាពលរដ្ឋតាមភូមិ
ជាពិសេសក្នុងទីវត្តអារាមតែម្ដង។
លោក ពេញ លេញ បញ្ជាក់ថា
ក្រុមការងាររបស់ក្រុមហ៊ុនបានមកពន្យល់លោកដោយសន្យាផ្ដល់ការប្រាក់
រៀងរាល់ខែទាំងដើមទាំងចុងក្នុងរយៈពេល ១៥ខែ
ហើយអ្នកដែលបានមកណែនាំរូបលោកនោះ គឺជាព្រះសង្ឃ
ហើយព្រះសង្ឃអង្គនោះ គង់នៅវត្តមួយកន្លែងក្នុងខេត្តសៀមរាប។
លោកបន្តថា ដោយឃើញជាព្រះសង្ឃដូច្នោះ ធ្វើឲ្យលោកមានជំនឿ
ហើយបានសម្រេចចិត្តយកប្លង់ដីរបស់ខ្លួនទៅដាក់បញ្ចាំនៅធនាគារ
បានប្រាក់ជាង ១ម៉ឺនដុល្លារ
រួចយកប្រាក់នោះទៅដាក់ជាមួយក្រុមហ៊ុនតាមរយៈព្រះសង្ឃតែម្ដង។
ប៉ុន្តែក្រោយពីបានយកប្រាក់ទៅដាក់ជាមួយក្រុមហ៊ុនហើយ
បែរជាពុំបានទទួលការប្រាក់ដូចការអះអាងឡើយ។
លោក ពេញ លេញ៖ «យកប្លង់ដីទៅបញ្ចាំឲ្យគេហ្នឹង
ដល់ពេលនេះលោកហ្នឹងអ្នកធានា ថាបើកលុយឲ្យរៀងរាល់ខែ ១៥ខែ
រួចទាំងដើមទាំងការ។ ដល់បើកបានតែ ២ខែបាត់ទៅ
ដល់ខ្ញុំតេទៅសួរក្រុមហ៊ុន
គេថាឲ្យរកអតិថិជនបន្តបានបើកលុយឲ្យទៀត។
ដល់អ៊ីចឹងខ្ញុំនឹកឃើញថា ក្រុមហ៊ុនបោកទេយ៉ាង
ក្នុងចិត្តខ្ញុំគិតអ៊ីចឹង។ ខ្ញុំតេទៅលោកសង្ឃ
ដល់តេទៅលោកសង្ឃៗដែលនាំដាក់ហ្នឹងថា បងឯងទៅដាក់ខ្លួនឯង
ទៅដោះស្រាយខ្លួនឯងទៅ ឆ្លើយថាអ៊ីចឹង បានខ្ញុំអស់ជំនឿ
ខ្ញុំភ័យខ្លួនឯង។ ដល់ចុងក្រោយមក
ខ្ញុំធ្វើពាក្យប្ដឹងលោកសង្ឃហ្នឹង ដាក់ទៅតុលាការខេត្តព្រៃវែង»។
បច្ចុប្បន្នសំណុំរឿងនេះនៅពុំទាន់មានចំណាត់ការអ្វីមួយជាដុំកំភួនពីតុលាការខេត្តព្រៃវែង នៅឡើយទេ។
ប្រជាពលរដ្ឋឲ្យដឹងថា
ក្រុមហ៊ុនបណ្ដាញជាប្រភេទក្រុមមួយគ្មានអាគារទីស្នាក់ការរបស់ខ្លួន
ច្បាស់លាស់ឡើយ
ហើយក្រុមហ៊ុនមួយនេះរកស៊ីដោយពឹងផ្អែកទាំងស្រុងទៅលើប្រាក់
បញ្ញើរបស់អតិថិជនដែលបានយកប្រាក់មកដាក់
និងទទួលបានការប្រាក់ខ្ពស់ គឺការប្រាក់មួយខែប្រមាណ
១០ភាគរយនៃចំនួនទឹកប្រាក់របស់អតិថិជនដែលបានយកមកដាក់ជាមួយ
ក្រុមហ៊ុន។ ជាងនេះទៅទៀត
បើសិនជាសមាជិកណាអាចរកអតិថិជនចំណូលថ្មីបន្ថែម
នោះសមាជិកនឹងទទួលបានការប្រាក់បន្ថែមទៀតប្រមាណ ៥ភាគរយ
បើរកបានសមាជិកកាន់តែច្រើន
នោះប្រាក់ចំណូលនឹងកាន់តែបន្ថែមកើនឡើងជាលំដាប់ដែរ។
ស្រដៀងគ្នានេះដែរ ព្រះតេជព្រះគុណ ព្រះនាម រ័ត្ន ពិសិដ្ឋ
គង់នៅមួយកន្លែងនៅស្រុកបាភ្នំ ខេត្តព្រៃវែង មានព្រះថេរដីកាថា
សមាជិករបស់ក្រុមហ៊ុនបានមកបញ្ចុះបញ្ចូលដល់ក្នុងវត្តរបស់ព្រះអង្គ។
គ្រានោះសមាជិករបស់ក្រុមហ៊ុនបានបញ្ជាក់ហេតុផល
ដោយផ្ដល់ការប្រាក់ដល់អតិថិជនរៀងរាល់ខែដោយពុំមានការរអាក់រអួល
ឡើយ។
ដោយតម្រូវបច្ច័យមួយចំនួនដើម្បីបន្តការសិក្សារៀនសូត្ររបស់
ព្រះអង្គ ឃើញដូចនេះ ព្រះអង្គក៏សម្រេចចិត្តប្រមែប្រមូល
រួមទាំងព្រះសង្ឃដទៃទៀតក្នុងវត្ត បានប្រាក់ប្រមាណ ៣០០ដុល្លារ
ហើយយកទៅដាក់ជាមួយសមាជិកក្រុមហ៊ុននោះតែម្ដង។
ព្រះតេជព្រះគុណ ព្រះនាម រ័ត្ន ពិសិដ្ឋ៖ «មូលហេតុអ្វីបានជាយកលុយ
ហ្នឹងទៅដាក់? គឺទី១ អត់បានគិតទៅលើបញ្ហាថា
វានឹងមានបញ្ហាអ៊ីចឹង។ ទី២ អាត្មាដាក់លុយហ្នឹង
គម្រោងថានៅពេលដែលយើងរាល់ខែអ៊ីចឹងទៅ
យើងគម្រប់ថាបានពីរបីខែអ៊ីចឹងទៅ អាត្មាក៏មានគំនិតថា
៣០០របស់អាត្មាហ្នឹងវានឹងអាចកើតកូនបាន ហើយក្នុងរយៈពេល ២បីខែ
អាត្មាថានឹងបើកយកទៅប្រឡង គម្រោងអាត្មាគឺប្រឡងបាក់ឌុប
ហើយអាត្មាគិតថា យកលុយហ្នឹងទៅបំពេញការរៀនរបស់អាត្មា
ដល់ពេលលទ្ធផលចុងក្រោយមកអត់បានទទួលអ្វីសូម្បីតែបន្តិច»។
ព្រះអង្គមានព្រះថេរដីកាបញ្ជាក់បន្ថែមថា ក្រុមហ៊ុនបណ្ដាញនេះ
ធ្វើសកម្មភាពនៅស្រុកបាភ្នំ ចាប់តាំងពីដើមខែមេសា ឆ្នាំ២០១៣ មក។
ក្នុងនោះថវិការបស់ប្រជាពលរដ្ឋចំណុះជើងវត្ត រួមទាំងព្រះសង្ឃផង
ដែលបានចាញ់បោកតាមរយៈក្រុមហ៊ុនមួយនេះ រួមប្រមាណជាង
១ម៉ឺនដុល្លារហើយ។
វិទ្យុអាស៊ីសេរី ពុំទាន់អាចទាក់ទងប្រធានក្រុមហ៊ុនបណ្ដាញ
អែហ្វ.អ៊ិច.អាយ.ស៊ី ដើម្បីសុំប្រតិកម្មតបបានទេ នៅថ្ងៃទី១៥ ធ្នូ។
ប៉ុន្តែសមាជិកក្រុមការងាររបស់ក្រុមហ៊ុន គឺលោក ផល្លា បានឲ្យដឹងថា
បញ្ហារបស់ប្រជាពលរដ្ឋនិងព្រះសង្ឃនៅស្រុកបាភ្នំនោះ
ពុំមែនជាកំហុសរបស់ក្រុមហ៊ុនទេ
គឺបញ្ហានេះបង្កឡើងដោយសារអតិថិជនមិនយល់ពីគោលការណ៍
និងមិនបានអនុវត្តតាមការណែនាំរបស់ក្រុមហ៊ុន។
លោក ផល្លា៖ «ខ្ញុំធ្លាប់ឮចេញពីខាងហ្នឹងមកដែរ
ប៉ុន្តែដោយសារតែលោកម្នាក់ដែលនិយាយហ្នឹងប្រហែលជាគាត់ហ្នឹងមិន
មកចូលរួមនឹងគេ។
គេអញ្ជើញគាត់មកក្រុមហ៊ុនដើម្បីស្ដាប់គេស្ដាប់ឯងថា
តើក្រុមហ៊ុនយ៉ាងម៉េចៗ? គាត់មិនដែលមកចូលរួមកម្មវិធីរបស់គេ
ហើយគាត់មកនិយាយអ៊ីចឹង។ ខ្ញុំមិនកាន់ជើងក្រុមហ៊ុនទេ
ខ្ញុំក៏អ្នករកស៊ីដូចគាត់ដែរ
ហើយខ្ញុំទៅចូលរួមកម្មវិធីរបស់ក្រុមហ៊ុនហើយ
ក្រុមហ៊ុនអត់មានបញ្ហាអីទេ»។
ប្រជាពលរដ្ឋឲ្យដឹងថា
ទីស្នាក់ការរបស់ក្រុមហ៊ុនមានទីតាំងនៅរាជធានីភ្នំពេញ
ហើយក្រុមហ៊ុនបណ្ដាញមួយនេះបានផ្លាស់ទីកន្លែងស្នាក់ការរបស់ខ្លួន
ញឹកញាប់រៀងរាល់ ៦ខែម្ដង។
សព្វថ្ងៃក្រុមហ៊ុនបណ្ដាញប្រភេទនេះបានវាយលុកក្នុងរាជធានីភ្នំពេញ
និងរាលដាលដល់ប្រជាពលរដ្ឋតាមបណ្ដាលខេត្តទូទាំងប្រទេស។
ហើយប្រជាពលរដ្ឋដែលពុំមានការយល់ដឹងពីរបរជំនួញរបស់ក្រុមហ៊ុន
ប្រភេទនេះ ជាអ្នកងាយរងគ្រោះ ខាតបង់ប្រាក់កាសរបស់ខ្លួន៕
ប្រភព RFA
ចំណាត់ក្រុមៈ 
0 comments:
Post a Comment